عمار بن حسان طائی
دا مقاله د تدوین په حال کې ده!
عَمّار بن حَسّان طایي د امام حسین(ع) له ملګرو او د کربلا له شهیدانو دی. په زیارت الشهدا ( غیر مشهور ناحیه مقدسه زیارت) کې د هغه نوم راغلی. د تاریخي سرچینو له مخې په ۶۱ ق کال عمار بن حسان له امام حسین سره یو ځای له مکې کربلا ته راغی او د کربلا په پېښه کې د عاشورا په ورځ شهید شو.
نوم او نسب
عَمّار بن حَسّان له طی قبیلې و.[۱] هغه د لومړۍ هجري پېړۍ له شیعیانو او د امام حسین (ع) له ملګرو ګڼل کیږي.[۲] په ځینو سرچینو کې د هغه نوم «عامِر بن حسان» راغلی دی. ځینې څېړاندو احتمال ورکړی چې دا اتفاق له عامر بن مسلم (د عاشورا د پېښې له شهیدانو او احتمالا د عمار وراره) سره د نوم د شباهت په وجه رامینځته شوی؛ یا دا چې دا دوه نومونه د یوه نوم دوه ضبطه دي چې له یو بل سره د شباهت په وجه ګډوډ شوې دي.[۳] محمد شوشتري هم په قاموس الرجال کتاب کې احتمال ورکړی چې «عمار بن حسان» او «عمار بن ابیسلامه» (د عاشورا د پېښې له شهیدانو) یو کس وي.[۴]
د عمار پلار، «حسان بن شریح» یې هم د امام علي (ع) له اصحابو ګڼلی چې په جمل او صفین جنګونو کې د امام علي (ع) په سپایانو کې و او په صفین جنګ کې شهید شو.[۵]د شیعه راوي او د «قضایا امیرالمؤمنین» کتاب لیکوال عبدالله بن احمد د عمار لمسی ګڼل کیږي.[۶]
په کربلا کې شهادت
نجاشي، عمار بن حسان د هغو کسانو په لیکه کې ګڼي چې د عاشورا په ورځ د هجرت په ۶۱ کال په کربلا کې شهید شو.[۷] د څېړاندو په اند عمار له مکې د امام حسین (ع) د تګ په وخت له هغه سره شو.[۸]د تاریخي سرچینو له مخې، د کربلا په پېښه کې، امام حسین (ع) په دې هیله چې د عمر سعد سپایان له جنګه لاس واخلي، په یوې خطبې کې هغوي ته نصیحت وکړ؛ خو هغوي د امام نصیحت ونه مانه، له دغه خطبې وروسته شمر له خپلو یو شمېر لښکریانو سره له کیڼ او ښي لوري د امام حسین (ع) د اصحابو په خیمو برید وکړ او پرې یې غشي وورول. دغه یرغل په تاریخي کتابونو کې په «لومړۍ حمله» مشهور شوی دی.[۹]
عمّار بن حسان د دغه حملې یو شهید ګڼل کیږي.[۱۰] البته ځینو سرچینو د عمار شهادت د جنګ په مېدان کې او د امام حسین (ع) د سترګو په وړاندې راپور کړی دی.[۱۱]
په زیارت الشهدا کې په «اَلسّلامُ عَلَی عَمّار بنِ حَسّان» عبارت سره هغه ته سلام شوی دی. ۱۲]