د رمضان یوویشتمه شپه

د رمضان یوویشتمه شپه د امام علي(ع) د شهادت شپه او د شیعه په کالهنداره کې یو مناسبت دی.

د تاریخي راپورونو له مخې، امام علي(ع) د روژې په نولسمه شپه د ابن ملجم مرادي په لاس په توره ووهل او د دغه ګوزار په وجه په یوویشتمه شپه شهید شو. په همدې مناسبت شیعیان په دې شپه کې د هغه لپاره ویر کوي. همداراز د ایران په ځينو سیمو کې په یوویشتمه شپه د قنبر او حضرت علي(ع) په نوم یوه تعزیه هم اجرا کیږي.

د یو روایت په اساس چې په شیعه سرچینو کې نقل شوی، د روژې یوویشتمه شپه د نولسمې او درې ویشتمې شپې تر څنګ یوه له هغو شپو ده چې احتمال شته د قدر شپه وي. له دې امله شیعیان دغه شپه په جوماتونو، کورونو، حسینیو او نورو مذهبي ځایونو کې د شپې په روڼولو او قدر شپې په اعمالو تېروي. په مفاتیح الجنان کې د شیخ عباس قمي په لیکنه، د یوویشتمې شپې فضیلت تر نولسمې شپې زیات دی. ځینې عملونه چې په دغه شپه کې یې سپارښتنه شوې ده دادي:

1. شپه روڼول
2. د قدر د شپې غسل
3. د قدر شپې د لمونځ کول
4. سل رکعته لمونځ
5. قرآن په سر نیول
6. له ځوارلس معصوم سره توسل

ځينې شیعیان په یوویشتمه شپه، نذرونه، روژه ماتی او پېشمنی تقسیموي. د ایران په لرستان کې په دغه شپه کې یو خاص نذر پخول کیږي چې ورته د یوویشتمې حلوا ویل کیږي.

اړونده لیکنې

• د رمضان نولسمه شپه