د اهل بیت نړیواله ټولنه

د اهل بیت نړیواله ټولنه

د نړیوالې ټولنې لوګو
تأسیس	۱۳۶۹ش
بنسټ ایښودونکی	سید علی خامنه‌اي
لاره	د اسلامي مذهبونو نیږدی والي او د اهل‌بیتو مکتب خپرول
موخې	د اسلام معرفي کول، د قرآن او اهل بیت(ع) د تعلیماتو خپرول، د اسلامي مذهبونو نیږدی والي او په نړۍ کې د اهل بیت(ع) د پیروانو ملاتړ
عمومي منشي	رضا رمضاني ګیلاني
اړوند مرکزونه	د اهل بیت خبري آژانس • د اهل بیت د مکتب مجازی پوهنغونډ (ویکي شیعه)
ویب پاڼه	http://www.ahl-ul-bayt.org

د اهل بیت(ع) نړیواله ټولنه یوه غیر دولتي اداره ده چې د اسلام د معرفي کولو، د قرآن او اهل بیت(ع) د تعلیماتو خپرولو، د اسلامي یووالي د پیاوړتیا او په نړۍ کې د اهل بیت(ع) د پیروانو د ملاتړ په موخه جوړه شوې ده، او له دې موخو سره سم فعالیتونه ترسره کوي. دا اداره په ۱۳۶۹ کال کې د ایران د اسلامي جمهوریت د رهبر سید علي خامنه اي په ملاتړ پیل شوه. د دې ټولنې عمومي منشي د ایران د اسلامي جمهوریت د رهبر لخوا ټاکل کیږي. رضا رمضاني ګیلاني د دې ټولنې اوسنی عمومي منشي دی.

تاریخ، موخې او جوړښت

د اهل بیت (ع) نړیواله ټولنه د ۱۳۶۹ ل کال د مرغومي په ۱۰مه جوړه شوه؛ له دې مخکې، ۳۰۰ مسلمانو عالمانو، په ځانګړې توګه د اهل بیت(ع) پیروانو، په تهران کې په یوه ټولنه کې ګډون وکړ او بیا یې د ایران د اسلامي جمهوریت د رهبر سید علي خامنه اي څخه د اهل بیت(ع) د نړیوالې ټولنې د جوړولو اجازه او منظوري ترلاسه کړه.

د اهل بیت (ع) د نړیوالې ټولنې د جوړولو ځینې ټاکل شوي اهداف دا دي:

1. د اسلام د حیثیت او د پیغمبر، قرآن او د اهل بیت(ع) د حرمت دفاع
2. د اسلامي امت ترمنځ، په ځانګړې توګه د اهل بیت(ع) د پیروانو ترمنځ د یووالي ژورول او پیاوړتیا
3. په ټوله نړۍ کې د مسلمانانو او د اهل بیت(ع)د پیروانو د حقونو او مقام ملاتړ او مرسته
4. په ټوله نړۍ کې د اهل بیت(ع) د پیروانو د مادي او معنوي زیربناوو پراختیا
5. د رسنیو له ظلم او علمي او اقتصادي محرومیت څخه د اهل بیت(ع) د پیروانو لرې کول
6. د نړۍ د ټولو خلکو او ملتونو ترمنځ د سولې، دوستۍ، همکارۍ او پیوستون د رامینځته کولو هڅې.

عمومي منشي د اهل بیت(ع) د نړیوالې ټولنې لوړ پوړی اجرایوي رییس دی، چې د ولی فقیه لخوا د شورا د مدیریت او تصویب شویو پالیسیو د پلي کولو لپاره ټاکل کیږي. تر اوسه پورې، د ټولنې لپاره پنځه عمومي منشيان ټاکل شوي دي:

• محمدعلی تسخیري ( د ۱۳۶۹ له غویي میاشتې راهسې)،
• علي اکبر ولایتي ( ۱۳۷۸ له زمري میاشتې راهسې)،
• محمدمهدي آصفي (۱۳۸۱ له تلې میاشتې راهسې)،
• محمدحسن اختري (۱۳۸۳ وري میاشتې راهسې)،
• رضا رمضاني ګیلاني د (۱۳۹۸ل د تلې راهسې).

فعالیتونه

• الثقلین شبکه: یوه سپوږمګیزه شبکه چې په عربي او انګلیسي ژبو فعالیت کوي. د دې شبکې رسمي رجسټریشن په هالنډ کې دی او مرکزي دفتر یې په ترکیه کې موقعیت لري. د دې شبکې یو هدف د ټولنې د مختلفو برخو لپاره د اسلامي محتوا تولیدول دي. دا شبکه په ۱۳۸۸ کې تاسیس شوه.

د امام سجاد(ع) نړیوال کنفرانس د ۱۳۹۴ل کال د زمري په ۲۴مه نیټه د ۵۰۰ څخه زیاتو بهرنیو میلمنو په شتون کې د مشرانو د غونډې په تالار(سالن اجلاس سران) کې ترسره شو.

• علمي او کلتوري کنفرانسونه او نندارتونونه: د اهل بیت(ع) د کلتور د خپرولو او پراخولو او په فکري او نظریاتي بحثونو کې د اسلامي نړۍ د عالمانو د ګډون لپاره، مختلف ملي، سیمه ایز او نړیوال کنفرانسونه او غونډې ترسره شوې لکه:

• د امام حسن مجتبی(ع) نړیوال کانګرس: یوه ټولنه چې موخه یې د اهل بیت(ع) لارې او سیرت ته د اهمیت او ژمنتیا پیاوړتیا او پراختیا وه، د اهل بیت(ع) د لیدتوګې پر بنسټ د مذهبي هویت لپاره مناسب پلیټ فارم چمتو کول، د امام حسن (ع) د شخصیت تشریح او جامع معرفي کول، او د امام حسن(ع) په فکر کې د سولې او بحران د مدیریت د تیورۍ تشریح کول.
• د ناصر کبیر نړیوال کنفرانس.
• د پېغمبر اعظم(ص) ستر جایزه: د اهل بیت(ع) کلتوري او هنري فیسټیوال د دین د دفاع لپاره د هنري بڼو څخه د ګټې اخیستنې په هدف سره جوړ شو. د دې فیسټوال لومړۍ نسخه د رحمت او عدالت د پیغمبر حضرت محمد مصطفی(ص) له موضوع سره د پېغمبر اعظم(ص) د جایزې تر سرلیک لاندې په ۱۳۹۲-۱۳۹۳ کال کې ترسره شوه.
• د قدس د ورځې لپاره د کارټون نړیوال فیستیوال: د ۱۴۳۵ هجري کال د روژې په میاشت کې، د قدس د نړیوالې ورځې لپاره د کارټون نړیوال فیستیوال لومړۍ نسخه د قدس د ورځې، د اسلامي امت د یووالي او مقاومت د ورځې تر سرلیک لاندې ترسره شوه.
• د اهل بیت(ع) د ژوند د طرز په اړه علمي او څیړنیز کنفرانس د امام سجاد(ع) نړیوال کنفرانس، د اهل بیت(ع) د نړیوالې ټولنې او د شیعه ډاکټرانو نړیوال کانګرس لخوا یا د ټولنې په ګډون سره ترسره شو. همدارنګه، د اهل بیت (ع) د نړیوالې ټولنې پورې اړوند د کلتوري مرکزونو نندارتون د ۱۳۹۳ کال د سلواغې په پیل کې د یوې اونۍ لپاره د کلتوري ادارو او په نړیوال ډګر کې فعالو بنسټونو په شتون سره ترسره شو.
• د حضرت ابوطالب(ع) نړیوال کنفرانس: د اهل بیت(ع) د نړیوالې ټولنې لخوا د ۱۳۹۹ کال په کب کې د امام علي(ع) د پلار ابوطالب د شخصیت د درناوي په موخه په قم کې یو سیمینار جوړ شو.

• د عامه ګټو مرکزونو جوړول او ملاتړ: د جوماتونو، حسینیو، د قرض‌الحسنه صندوقونه، مذهبي مرکزونو، ښوونځیو، کتابتونونو، طبي مرکزونو او یتیم خانو په جوړولو کې مرسته د اهل بیت(ع) د نړیوالې ټولنې د کلتوري او ټولنیزو نوښتونو څخه دي، چې د خیرخواهانو په ملاتړ ترسره کیږي.
• د مختلفو شیعه ډلو سره تعامل: د اهل بیت(ع) نړیواله ټولنه د دولس امامي شیعه او نورو شیعه فرقو سره په اړیکه کې ده.
• ویکي شیعه: ویکي شیعه یو آنلاین پوهنغونډ دی چې د اهل بیت(ع) د فکر د مکتب د معرفي کولو او د اسلام او شیعه ګانو د تعلیماتو خپرولو لپاره کار کوي. دې دایرة المعارف خپل فعالیتونه د ۱۳۹۲ کال په غبرګولی کې پیل کړل او اوس مهال په ۲۲ ژبو کې فعال دی او په پښتو ژبه کې ۱٬۴۵۳ مقالې لري.
• خپرونه، ژباړه او په نندارتونونو کې ګډون: د ۲۰۱۵ کال تر دوبي پورې د اهل بیت(ع) د نړیوالې ټولنې او د هغې اړوند اهل بیتي(ع) ټولنو لخوا د خپرو شویو څېړنیزو کتابونو ټولټال شمېر شاوخوا ۱۸۰۰ سرلیکونو ته رسېدلی دی، او د هغو ژبو شمېر چې د ټولنې کتابونه پکې ژباړل شوي دي ۵۵ ته رسېدلی دی. سربیره پردې، د اهل بیت(ع) د نړیوالې ټولنې خپرونو د نړۍ په مختلفو برخو کې د کتابونو په نندارتونونو کې برخه اخیستې ده.
• د کتابتون او اسنادو مرکز: د اهل بیت(ع) د نړیوالې ټولنې د کتابتون او اسنادو مرکز له ۳۰،۰۰۰ څخه ډیر کتابونه، مجلې او څیړنیزې اسناد لري.
• د مجلې خپرول: د خپل کلتوري او تبلیغاتي ماموریت سره سم، د اهل بیت(ع) نړیواله ټولنه څو مجلې خپروي، لکه د اهل بیت(ع) مجلې، انتظار، بلاغ، پیام ثقلین، پیام زینب، توحید، ذوالقربی، سلام، توبه، فرشتګان کوچک، فریاد، قبله، کوثر، گنجینه المجماع، دا په مختلفو هیوادونو کې په مختلفو ژبو خپریږي او د یو شمیر اسلامي مجلو او خپرونو خپرولو ملاتړ کوي.
• د کتابتونونو سنبالښت: د اهل بیت(ع) نړیواله ټولنه د شیعه ګانو لپاره د کلتوري ملاتړ چمتو کولو لپاره د نړۍ په مختلفو برخو کې د ګڼ شمیر کتابتونونو ملاتړ او هغه یې تجهیز کړي دي.
• په ناڅاپي پیښو کې ملاتړ: د اهل بیت(ع) نړیواله ټولنه د نغدي او غیر نغدي مرستو راټولولو او لیږلو سربیره، په ناڅاپي پیښو کې خپل غړي او همکاران هم متحرک کوي چې د مرستو او پېسو په عادلانه او سم ویش هم څارنه کوي.
• د ابنا خبري آژانس: دا خبري اژانس په ۱۳۸۳ ل کال کې په دریو ژبو کې تاسیس شو چې د نړۍ له ګوټ ګوټ څخه د شیعه ګانو خبرونه منعکس کړي او شیعه ګانو ته د یو بل د وضعیت په اړه معلومات ورکړي. دا اوس مهال په ۲۴ ژبو کې خپل فعالیتونه جاري ساتي او د شیعه ګانو تر ټولو پراخه لیدل کیدونکی خبري اژانس دی.
• د اسلامي سافټویر تولید: په مختلفو ژبو کې د ساینسي سافټویر او ملټي میډیا کمپیکټ ډیسکونو تولید. دا د اهل بیت(ع) د نړیوالې غونډې یو له فعالیتونو څخه دی.
• د هنري کارونو تولید: د اهل بیت(ع) د نړیوالې غونډې د هنر واحد د آیتونو او روایتونو لسګونه ښکلي مذهبي انځورونه تولید کړي دي، او د هنري انځورونو ټولګه په یوه کتاب کې خپره شوې ده.
• د اهل بیت(ع) د تعلیماتو نړیواله شبکه: هغه سیسټم دی چې په ۱۴۰۲ هجري لمریز کال کې په مختلفو ژبو کې د اهل بیت(ع) د تعلیماتو د وړاندې کولو لپاره د معیاري شبکې رامینځته کولو، شبکې جوړولو او د سایبر سپیس په شرایطو او انټرنیټ کې د اهل بیت(ع) د تعلیماتو د معنوي شبکې رامینځته کولو په هدف رامینځته شوی.
• شیعه دیتا: د اهل بیت(ع) مکتب پورې اړوند یوه ویب پاڼه او د معلوماتو ذخیره، په ځانګړې توګه د ویکي شیعه او ویکي تراث معلومات. دا ډیټابیس په راتلونکي کې د شیعه معلوماتو د انجن په توګه ټاکل شوی ترڅو سایټونه، سافټویر، پروګرامونه، مصنوعي ځیرکتیا، او نور ورسره وصل شي.
• ویکي تراث: د اهل بیت(ع) مکتب په برخه کې یوه آنلاین ویکي کتابتون، چې د ټولو لیکل شویو شیعه میراثونو د راټولولو، خپرولو او ژباړلو په هدف رامینځته شوی، په مختلفو بڼو لکه کتابونو (د چاپ شوي او لاس لیکل شوي نسخو په ګډون)، مقالو، تیزسونو، مذهبي ادبیاتو او اسنادو کې.

اړونده موضوعات

• مجمع جهاني تقریب مذاهب اسلامي
• جامعة المصطفی(ص) العالمیة

باندنۍ تړنه

• وبگاه مجمع جهانی اهل‌بیت(د اهل بیتو د نړیوالې ټولنې ویب پاڼه)