جهاد نکاح

جهاد نکاح یوه اصطلاح ده چې د سوریې او عراق د حکومت سره د داعش د جګړې په جریان کې مشهوره شوه، او دا د شرعي واده له شرطونو پرته د داعش جنګیالیو سره د ښځو او نجونو لنډ مهاله ودونو ته اشاره کوي. دا عمل د لومړي ځل لپاره په 2010 میلادي کې په یوه فتوا سره مستند شو چې سعودي عربستان د وهابي عالم محمد العریفي په ټویټر پاڼه کې خپره شوه. البته العریفي د خپلې ټولنیزې شبکې د اکاونټ هک کولو ته په اشارې سره، له خپل اړخه د داسې فتوا صادرول رد کړل او د شرعي نکاح له شرایطو پرته یې د واده اړیکې ساتل د زنا مصداق وګڼلې.

د مسلمانانو عالمانو په اند، جهاد نکاح یو ډول زنا او د فحشا د ترویج یوه بڼه ده. جعفر سبحاني د تکفيريانو له خوا د جهاد نکاح د اسلام وقار ته زيان او ناصر مکارم شيرازي د اسلام د ضرورت په خلاف ګڼلې ده. د سید عبدالکریم موسوي اردبیلي په وینا هم جهاد نکاح حرام او دا ډول حکم بې اساسه او د نص په مقابله کې اجتهاد دی.

د داعش تر منځ د جهاد نکاح خپرېدل په اسلامي هېوادونو او د نړۍ په رسنیو کې پراخ انعکاس درلود. د سعودي د کورنیو چارو د وزارت ویاند منصور ترکي دغه جهاد نکاح د ترویج لامل د داعش په ترهګرې ډلې کې د ښځو یو ځای کیدل وګڼل چې موخه یې د خوارجو په بڼه د ماشومانو پالنه او یا ترهګریز عملیات وو.

ځینو عراقي سرچینو د داعش له خوا د موصل ښار د ښځو او نجونو د تښتولو او د هغوی جهاد نکاح ته د مجبورولو په اړه بېلابېلې احصایې خپرې کړي دي. په ۲۰۱۲ کال کې د تونس د کورنیو چارو وزیر لطفي بن جدو د هغو لسګونو امیندوارو ښځو د راستنېدو اعلان وکړ چې د جهاد نکاح لپاره سوریې ته تللې وې. خو د فرانس یوې ورځپاڼې لوموند د جهاد نکاح په ردولو سره یې دا خبرې د سوریې د حکومت د ملاتړو له خوا جوړې کړې ګڼلي.

مفهوم پیژندنه او تاریخ

د «جهاد نکاح» اصطلاح په 2010 کلونو کې د عراق او سوریې د حکومت سره د جګړې پرمهال د جنګیالیو سره د ښځو او نجونو د لنډ مهاله او څو ساعتو ودونو لپاره کارول کیده، داعش ډلې د عراق د دویم لوی ښار موصل د قبضې په نهمه ورځ، په ​​​​یوه اعلان کې د هغه ځای له اوسیدونکو څخه وغوښتل چې خپلې لوڼې د جهاد نکاح لپاره هغوي ته ورکړي.

په دې ډول کورولۍ کې د شرعي نکاح ځینې شرطونه لکه د ښځو عدت ساتلو خیال نه شي ساتلی. دا عمل په یوه فتوا کې مستند شوی چې د لومړي ځل لپاره د د سعودي وهابي عالم العریفي د ټویټر په پاڼه کې خپر شوه. او د دې کار په بدل کې ښځو ته د جنت وعده ورکړې شوه. البته عریفي د دې خبر له خپریدو وروسته، د ځان له خوا د داسې فتوا صادریدل رد کړل.

هغه همدارنګ په ​​۲۰۱۳ م کال کې د خپل ټویټر اکاونټ د هک کیدلو اعلان وکړ او د نکاح له شرطونو او قوانینو پرته یې د جهاد نکاح زنا وګڼله. بیا هم د عربستان یو وهابي مفتي ناصر اَلعُمر، په سوریه کې د داعش ځواکونو لپاره جهاد نکاح محارمو سره هم جایزه وګڼله. هغه وویل چې کله د شیعو په خلاف جنګ شورو وي، نو هیڅ ډول حرام نیشته. همدارنګ ویل شوي دي چې خباب مروان اَلحمد چې په فلسطین کې اوسیدونکی مبلغ دی، واده شویو میرمنو سره هم جهاد نکاح روا وګڼله؛ خو د دې خبر له خپرېدو وروسته يې د داسې فتوا صادرول رد کړل.

د فقهاوو غبرګون

ځينو شيعه او سني علماوو د جهاد نکاح د فساد او فحاشي د ترويج يوه بڼه ګڼلی او ورسره یې مخالفت کړی دی. هغوي جهاد نکاح په اماميه او سني فقه کې د نکاح د احکامو، شرطونو او ارکانو مخالفه ګڼلې ده. د یوې پوښتنې په ځواب کې سید موسی شبیري زنجاني په اسلام کې د جهاد نکاح په نامه د یوې مسلې له موجودیت څخه انکار کړی او ویلي یې دي چې د جهاد په حالت کې هم د نکاح د شرایطو او احکامو مراعات کول اړین دي لکه د نکاح لوستل، د خاوند نه درلودل او د ښځې په عدې کې نه شول.

ناصر مکارم شیرازي جهاد نکاح یوه لویه رسوايي او د اسلام د ضرورت خلاف ګڼي. جعفر سبحاني د تکفیریانو له خوا جهاد نکاح د اسلام عزت ته زیان رسونکی ګڼلې ده. هغه د هغو ښځو ماشومان چې د دې جهاد په نتیجه کې امیدواروې خپل وطن ته راستانې شوي دی ولد بالشبهه د حکم لاندې راوستي دي. سید عبدالکریم موسوي اردبیلي جهاد نکاح او محارمو سره واده حرام ګڼلی او داسې حکم يې بې اساسه او د نص په مقابله کې اجتهاد ګڼلی دی.

انعکاس

جهاد نکاح په اسلامي هېوادونو او د نړۍ په رسنیو کې پراخ انعکاس درلود. د سعودي د کورنیو چارو د وزارت ویاند تورن جنرال منصور ترکي ویلي دي چې د دغه جنسي جهاد د ترویج لامل د داعش ترهګرې ډلې سره د ښځو یوځای کیدل دي چې موخه یې د خوارجو په بڼه د ماشومانو پالنه او یا ترهګریزو عملیاتو ترسره کول وو. ځینو عراقي سرچینو د داعش له خوا د موصل ښار د ښځو او نجونو د تښتولو او د هغوی جهاد نکاح ته د مجبورولو په اړه بېلابېلې احصایې خپرې کړي دي. د ملګرو ملتونو د بشري حقونو عالي کمیشنر نافي بیلاري په وینا، ترهګرې ډلې چې د سوریې د حکومت مخالفې دي خپلې بې حرمتۍ ته د جهاد نکاح نامه ورکړې ده. په ۲۰۱۲ کال کې د تونس د کورنیو چارو وزیر لطفي بن جِدو د هغو لسګونو امیدوارو ښځو د راستنېدو اعلان وکړ چې د جهاد نکاح لپاره سوریې ته تللې وې.

داعش هڅه کوله چې د انټرنېټي اعلاناتو په مرسته غربي نجونې او ښځې راجلب کړي، او له اروپايي هېوادونو لکه انګلستان او اتریش څخه د هغو ښځو داعش سره د یوځای کېدو څو راپورونه خپاره شول. د فلسطین او سوریې د مسئلې په اړه د شام د علماوو د اتحادیې مرستیال عبدالله محمد کتمتو دغه فتوا د نکاح او جهاد په سپېڅلو کلماتو باندې یو مړوونکی ګزار وګڼه. هغه د واده مشروعیت د ټولنې د ساتنې او د جهاد مشروعیت یې د اسلام د خپرولو لپاره بیان کړ. د تیونس د جماعت د امامانو عمومي منشي د دغه هیواد د مذهبي چارو د وزیر د محاکمې غوښتنه وکړه ځکه چې هغه د دې فتوا د صادرونکو ملاتړ کړی و.

د بلغارستان اووم چینل په یوه مستند فلم کې له هغو نجونو سره مرکه کړې چې په سوریه کې یې د جهاد نکاح درلوده. همدارنګه د بي بي سي د انګلیسی خپرونې په یوه خپرونه کې په تونس کې د القاعدې ډلې پورې تړلې ملېشې، پوځ سره د جګړې پر مهال، د جهاد نکاح د ترسره کولو اعترافونه او شواهد خپاره شول. د سعودي د پارلمان د یوه غړي او قاضي عیسی الغیث په وینا، جهاد نکاح له سنیانو څخه بهر یوه مفکوره وه، چې د ځینو سني نفرت کوونکو له خوا تعقیب شوه او د هغوی له خوا تجویز شوه. د فرانس یوې ورځپاڼې لوموند د جهاد نکاح په ردولو سره یې دا خبرې د سوریې د حکومت د ملاتړو له خوا جوړې کړې ګڼلي چې ورسره د خپلو مخالفانو څېره بدرنګه کړي.