سید مجتبی خامنه اي

سید مجتبی خامنه اي

د ایران د اسلامي جمهوریت درېیم رهبر
بشپړ نوم	سید مجتبی حسیني خامنه‌اي
نسب	له افطسي سیدان او سلطان سید احمد
د زیږیدو نیټه	د ۱۳۴۸ لمریز کال د وږي ۱۷مه نیټه
د زیږیدو ښار	مشهد
د زیږیدو هیواد	ایران
د ښځې نوم	زهرا حداد‌ عادل
مشهور خپلوان	سید جواد حسیني خامنه‌اي (نیکه) سید علی حسیني خامنه‌اي (پلار) غلامعلي حداد عادل (خسر)
مذهب	شیعه
ښوونکي	سید علی خامنه‌اي سید محمود هاشمي شاهرودي محمدتقی مصباح یزدي محسن خرازي لطف‌الله صافي ګلپایګاني
لاسلیک

د عراق او ایران د جګره په جبهو کې له ښي خا څخه سید مجتبی خامنه‌اي دریېم کس

سید مجتبی حسینی خامنه‌اي (زوکړه ۱۳۴۸ل) د ایران د اسلامي جمهوریت د نظام دریم رهبر د ایت الله سید علي خامنه اي زوی دی. هغه د امریکا او صهیونسټ رژیم په لاس د خپل پلار له شهادته وروسته، د رهبرۍ د خبرګانو مجلس له خوا د ۱۴۰۴ ل کال د کب په اولسمه نیټه د ایران د اسلامي جمهوریت د نظام د رهبر په توګه وټاکل شو.

ژوند لیک

سید مجتبی، په ۱۳۴۸ل کال کې مشهد کې وزېږېد. هغه د لېسې دوره یې د تهران په علوي ښوونځي کې تېره کړه او د دیني زده کړې د خپل پلار او د سید محمود هاشمي شاهرودي شاګردي وکړه او په ۱۳۷۸ل کال کې د تعلیم د دوام لپاره قم ته لاړ او د محمد تقي مصباح یزدي، محسن خرازي، لطف الله صافي ګلپایګاني په شان استادانو په درسي ټولګو او د علي عندلیبي په خصوصي درس کې یې برخه واخسته.

هغه له ۱۳۹۰ تر ۱۴۰۳ ل کاله پورې د قم په علمي حوزې کې د فقې او اصول د خارج درس ورکاوه. دغه درس چې ویل کیږي کابو دیارلس کاله یې دوام درلود او کابو اوو سوو کسانو پکې ګډون کاوه، د ۱۴۰۳ ل کال په تلې میاشتې کې د هغه په شخصي غوښتنې سره بند شو.

سید مجتبی خامنه اي په ۱۳۷۸ل کال کې د غلامعلي حداد عادل له لور زهرا حداد عادل سره واده وکړ. له دغه مېرمنې څخه د هغه دوه زامن او یوه لور شوې دي. د هغه مېرمنه د ۱۴۰۴ ل کال د کب په ۹مه د رهبرۍ په کور د اسراییلو او امریکا په ګډه حمله کې له ایت الله سید علي خامنه اي سره یو ځای شهیده شوه او په خپله هغه هم ژوبل شو.

هغه له ایران سره د عراق د جنګ په وخت په ۱۳۶۵ ل کال او په ۱۷کلنۍ کې جبهې ته واستول شو او د محمد رسول الله د ۲۷ فرقې د حبیب بن مظاهر کنډک د غړي په توګه یې په ځینو عملیاتو لکه بیت‌المقدس ۲، ۳ و ۴، والفجر ۱۰ او مرصاد کې برخه واخیسته.

د ۱۳۹۸ ل کال په لړم میاشتې کې د امریکا د متحده ایالتونو خزانې وزارت هغه د بیت رهبرۍ (د رهبر د کور) له اتو اړوند کسانو سره یو ځای بایکاټ کړ.

د قدس د ورځې په لاریون کې د سید مجتبی خامنه‌ای له خپلې کورنۍ سره ګډون (۱۳۹۳ل)

د اسلامي جمهوریت رهبري

د ۱۴۰۴ ل کال د کب په اولسمه، د رهبرۍ د خبرګانو مجلس، د سید علي خامنه ای له شهادته د اتو ورځو له تېرېدو وروسته سید مجتبی خامنه اي د ایران د اسلامي جمهوریت د دریم رهبر په توګه وټاکه. د دغه ځنډ سبب، د خبرګانو د غونډې په خلاف امنیتي ګواښونه اعلان شوی دی. په همدې لړ کې د امریکا متحده ایالتونو او صهیونسټ رژیم په قم او تهران کې د خبرګانو مجلس په ودانیو بریدونه وکړل او هغه یې ورانې کړې. له دې انتخابه مخکې، د ایت الله مکارم شیرازي او ایت الله نوري همداني په شان شخصیتونو چې د تقلید مراجع دي او مختلفو ډلو، د رهبرۍ د ټاکنې په پروسه کې د چټکتیا په ضرورت ټینګار کړی و.

غبرګونونه

د ایران د نوي رهبر ایت الله سید مجتبی خامنه ای سره بیعت (تهران ، د ۱۴۰۴ ل کال د کب ۱۸مه نېټه

د ایران د نوې رهبر ټاکنه، د هیواد دننه او بهر له پراخو غبرګونونو او انعکاسونو سره مخ شو. د مختلفو هیوادونو سیاسي مقاماتو، د اسلامي مقاومت ډلو او د ایران د اسلامي جمهوری لوړو مسوولانو په دغه انتخاب مبارکي وویله. په ایران کې د شخصیتونو پر مبارکۍ ویلو سربېره، مختلفو ډلو او ادارو له نوي رهبر سره په بیعت او له هغه په پېروۍ ټینګار وکړ او د بیعت عمومي غونډې په ټول هیواد کې د خلکو په ولوله ناک ګډون سره ترسره شوې.

د تقلید مرجع ایت الله نوري همداني، د سید مجتبی خامنه اي انتخاب غوره او حکیمانه وباله او هغه یې د رهبرۍ له پاره د ټولو شرایطو منجمله، فقاهت، زړورتیا، تقوا، زمان پېژندنې، مدیریت او تدبیر لرونکی وباله. ایت الله مکارم شیرازي هم د خبرګانو انتخاب اصلح وباله او خلک او د نظام غړي یې له نوي رهبر سره د بیعت، او په اتحاد او اتفاق سره د انقلاب د لارې جاري ساتلو ته وبلل.

د روسیې ولسمشر ولادیمیر پوټین هیله وکړه چې سید مجتبی خامنه اي د خپل لارې ته په عزت سره دوام ورکړي او د ایران خلک د ناخوالو په وړاندې متحد کړي.

د دې په مقابل کې د امریکا متحده ایالتونو او صهیونسټ رژیم په دغه اننتخاب اندیښنه څرګنده کړه او د ایران نوی رهبر یې په ترور وګواښه. له دې مخکې هم دغه دوه رژیمونود ایران په رهبرۍ د د سید مجتبی خامنه اي د ټاکلو په اړه خبرداری ورکړی و.

د رهبری په وخت مواضع

د ۱۴۰۴ ل کال د کب په ۲۱ سید مجتبی خامنه ای خپل لومړی رسمي پېغام د نوي مشر په توګه د رمضان د جګړې پر مهال خپور کړ. دې پېغام په نوي پړاو کې د نظام د لویو سیاستونو چوکاټ او د مقاومت د جبهې لور نیونه انځوروله. پېغام په اوو عنوانونو کې برابر شوی او د دغه مطالبو په اړه پکې ټکي شامل دي: د ایت الله سید علي خامنه اي د رول او مقام، د ولس دندې، وسله وال ځواکونه، اجرایي ادارې، د مقاومت چورلیز، د سیمې هیوادونه او له بهرنیو دښمنانو سره د مقابلې طریقې. همداراز په دې پېغام کې « په ایران د تیري ګرو» په وړاندې د سیمې هیوادونو د دریځ د روښانولو پر ضرورت او د پردیو د پوځي او مالي اډو په بندولو ټینګار شوی دی. هغه په سیمه کې د سولې او امنیت په ټینګولو کې د متحده ایالتونو ادعا «ښکاره دروغ» وبلل او د تیري ګرو تر کامل شاته پورې د هرمز تنګي د بندولو څخه د فشار د اړم په توګه پر استفادې یې ټینګار وکړ.

هغه همدارنګه د کوچني اختر او نوروز د رارسېدو په درشل کې، د دولس ورځنۍ جګړې، د ۱۴۰۴ل کال د مرغومي د پېښو او د رمضان د جګړې د شهیدانو له کورنیو او پاتې کسانو سره د خواخوږۍ تر څرګندولو وروسته، د مرغومي پېښې کودتا او جګړه وبللې. همدارنګه یې د ۱۴۰۵ل کال شعار «مقاومتي اقتصاد د ملي یووالي او ملي امنیت تر سیوري لاندې» اعلان کړ. په دې پیغام کې له ګاونډیو هېوادونو سره پر ښو اړیکو ټینګار شوی و او له افغانستان او پاکستان څخه غوښتنه وشوه چې لږ تر لږه د مسلمانانو د یووالي د ساتلو لپاره له یو بل سره ښې اړیکې ولري. همدارنګه د لبنان د حزب‌الله عمومي منشي نعیم قاسم ته په خطاب کې یې وویل چې د ایران د اسلامي جمهوریت ثابت سیاست د امام خمیني او سید علي خامنه‌ای د لارې دوام دی، چې د امریکا او صهیونیزم پر وړاندې د مقاومت له دوامدار ملاتړ سره ولاړ دی.

د ۱۴۰۵ لمریز کال د وري په ۲۰مه، چې د سید علي خامنه‌اي د شهادت له څلوېښتمې ورځې سره هممهاله وه، په یوه پیغام کې یې هغه د وخت پېژندونکی او بصیر فقیه، نه ستړې کېدونکی مجاهد، عامل او رباني عالم، د ذکر، تهجد او د ربوبیت دربار ته د تضرع اهل، د معصومینو په دربار کې توسل او د الهي ژمنو باورمن وباله. همدارنګه د دې پیغام په یوه برخه کې یې د خلکو پر دوامدار حضور په ډګر کې ټینګار وکړ او د ایران له سویلي ګاونډیو څخه یې وغوښتل چې د بهرنیو قدرتونو پر ژمنو باور ونه کړي.