د مقاومت چورلیز

دا مقاله د تدوین په حال کې ده!

د مقاومت چورلیز یا د مقاومت جبهه، هغه نوم دی چې یو سیمه ایز ایتلاف ته اشاره لري چې پکې زیاتره شیعه دولتي او غیر دولتي ځواکونه، چې په ایران، سوریې، عراق، لبنان، یمن او فلسطین کې فعالیت کوي شامل دي. د مقاومت د چورلیز موخې د اسراییلو له نیواکګرۍ سره مبارزه، د فلسطین د ازادۍ دفاع، په لویدیځه اسیا سیمه کې د لویدیځ په تېره بیا امریکا د نفود مخنیوی، له استبدادي او ظالمو دولتونو سره مقابله او د داعش په شان د تکفیري ډلو د اقداماتو مخنیوی ګڼل شوی دی. د مقاومت چورلیز جوړېدل د ایران د اسلامي انقلاب څخه د راپورته شویو ارزښتونو د پراختیا نتیجه او له استبداد مخالفه او ښکېلاک ضده غورځنګونو څخه د ایران د اسلامي جمهوریت نظام د ملاتړ پایله ګڼل کیږي.

د ګډو ټولنیزو، دیني او کلتوري ارزښتونو او اصولو پر چورلیز ګډ سیمه ایز هویت او د سیاسي اسلام له نظریې اغېزمنل د مقاومت چورلیز له اصلي ځانګړنو بلل شوې چې د دغه چورلیز د غړو د اتحاد سبب شوي دي د مقاومت محور له اصلي استراتژیو څخه، له هغو ګواښونو سره د مقابلې لپاره د پوځي توان زیاتول دي چې د دغه چورلیز موجودیت ګواښي. د شیعیانو د ځایګي اوچتول، د صهیونسټ رژیم د پراختیا غوښتنو او د لویدیځې اسیا په سیمه کې د نوي نظم د جوړېدو محدودول، د دغه چورلیز د غړو منجمله د ایران د قدس لښکر، د فلسطین د حماس او اسلامي جهاد، په عراق کې د حشد الشعبي، د لبنان حزب الله او د یمن د انصارالله غورځنګ له لاسته راوړنو ګڼل کیږي.

د مقاومت چورلیز ځواکونو د خپلو فعالیتونو او موخو د انعکاس لپاره ځینې چینلونه او خبري اژانسونه لکه المنار چنیل، المیادین چینل، المسیره چینل او الفرات چینل جوړ کړی دی. د ایران د اسلامي جمهوریت ریډیو ټیلي ویژن هم د دغه چورلیز د اقداماتو د انعکاس لپاره مختلف پرګرامونه جوړ او خپروي.

حیثیت او مقام

د مقاومت چورلیز، (په انګریزې Axis of resistance) یو سیمه ایز اتحاد دی چې په اسلامي نړۍ کې د ایران د اسلامي انقلاب د نظریې د پراختیا پایله ګڼل کیږي او د سیاسي څېړاندو په باور په لویدیځې اسیا سیمې واکمن انډولونه یې بدل کړې[۱]او په دې سیمه کې د یو نوي نظم د جوړېدو سبب شوی دی.[۲] د استعمارضد او استبداد مخالفه غورځنګونو او خوځښتونو څخه د ایران د اسلامي جمهوریت د نظام ملاتړ او همداراز د اسلامي بیدارۍ له مسالې ملاتړ، د مقاومت غورځنګ د پراختیا، د شیعیانو د پیاوړتیا او په ایران او سیمه کې د ایران د مقام د لوړتیا سبب ګڼل شوی دی.[۳]

سیاسی څېړاندي هغه څه چې د مقاومت چورلیز ګڼل کیږي په بهر نړۍ کې د ایران د اسلامي انقلاب څخه د راوتلو فکري پایلو او اثارو تر اغیز لاندې ګڼي چې هڅه کوي په نړیوال سیاست کې د لویو طاقتونو په سلطې اعتراض وکړي.[۴] د هغوي په وینا، د انقلاب بېلګې، مقاومت، او هویت د ایران په خلاف د عراق د جنګ په وخت کې جوړې شوې او له جنګه وروسته، د انقلاب د صادرېدو په پروسې کې، د اسلامي بیدارۍ په غورځنګونو کې یې سیمه ایز او نړیوال انعکاس ومونده.[۵]

د لویدیځې اسیا[۶] په سیمه کې د شیعانو قدرت موندل،د فلسطینیانو د حقوقو احقاق، د ځينو سیمه ایزو طاقتونو له لوړتیا غوښتنو سره مقابله، د ایران د اسلامي جمهوري نظام د عزت ساتنه،[۷] په سیمه کې د ځینو زورواکه رژیمونو سقوط،[۸] په مینځني ختیځ سیمه کې د امریکا د هژمونۍ سقوط، له صهیونسټ رژیم سره د ساز باز مذاکراتو ننګول، د لبنان له جنوبه د اسراییلو بهر شړل، په ۳۳ ورځني او ۲۲ ورځني جنګونو کې د صهیونسټ رژیم ماته، او د داعش په شان تکفیري ډلو په وړاندې مقاومت په لویدیځه اسیا سیمه کې د مقاومت غورځنګ د شتون له پایلو ګڼل شوې دي.[۹]

جوړېدل او نوم کېښودل

د مقاومت غورځنګ یا مقاومت جبهه یوه سیمه ایزه جیو پولیټک ټلواله (سیاسي او پوځي اتحاد) ګڼل کیږي چې له څو دولتي لوبغاړو (ایران او سوریې) او یو شمېر غیر دولتي لوبغاړو (د لبنان حزب الله، حماس او د فلسطین اسلامي جهاد غورځنګ) څخه جوړ شوې دي[۱۰] چې البته ویل شوي مشري یې د ایران له اسلامي جمهوریت سره ده.[۱۱] دغه ټلواله د ځینو تارخي پېښو پایله ګڼل کیږي چې د شلمې پېړۍ په وروستیو او د یوویشتمې پېړۍ په لومړیو کې په فلسطین او لبنان کې د صهیونسټ رژیم له اقداماتو سره د مقابلې، په سوریې او عراق کې د داعش د نفود له پراختیا او په مینځني ختیځ سیمه د امریکا د متحده ایالتونو له سلطې سره د مقابلې لپاره جوړ شو.[۱۲]

د سیاسي څېړاندو په باور، د مقاومت غورځنګ غړي ګډې ملي او نظریاتي ګټې لري او هڅه کوي په خپلو مستقلو او مقاومت محور سیاستونو سره، په لویدیځه اسیا کې د امریکا په چورلیزتوب د سلطې له نظام سره مقابله وکړي[۱۳] او همداراز له صهیونسټ رژیم سره مبارزه او د فلسطین دفاع وکړي.[۱۴] د مقاومت چورلیز په لویدیځه اسیا کې د ځینو نویو بدلونونو په راتللو منجمله د داعش په جوړېدو او په یمن د ځینو لویدیځو هیوادونو په حملې سره، د ۲۱ میلادي پېړۍ په لومړیو کلونو کې پراخ شو او ځینې نور لوبغاړي لکه په عراق کې شیعه ملیشا او د یمن انصار الله هم د مقاومت له چورلیز سره یو ځای شول.[۱۵]

د مقاومت چورلیز سیاسي اصطلاح په لومړي ځل د لیبیا د ورځپاڼې الزحف الاخضر له خوا د شرارت چورلیز د اصطلاح په مقابلې کې وکارول شوه چې د امریکا د هغه وخت ولسمشر جارج ډبلیو بوش او جان بولټن د متحده ایالاتو له سیاستونو سره ناغږمله هیوادونو ته د اشارې لپاره کارولې وه او پکې یې ایران، سوریه، عراق، لیبیا، کیوبا او شمالي کوریا د شرارت چورلیز ګڼلې وو.[۱۶]

له دې مخکې د ایران د اسلامي جمهوریت لارښود ایت الله خامنه ای ، په لومړي ځل د ۱۳۷۲ ل کال د زمري په میاشته کې د لبنان د هغه وخت د عمومي منشي سید حسن نصر الله سره په کتنه کې، د اسلامي مقاومت د جبهې خبره کړې او د هغې جوړېدل یې د اسراییلو د تیریو پایله ګڼلې وه.[۱۷]

څانګې یې

د مقاومت چورلیز ډلې او ځواکونه په مختلفو هیوادونو کې فعالیت کوي:

• ایران: سپاه قدس او د هغه لاندې څانګې زینبیون او فاطمیون؛
• عراق:حشد الشعبي، سپاه بدر، کتائب حزب الله ، حزب الدعوة الاسلامیه، مجلس اعلای اسلامي او د صدر بهیر؛
• سوریه: دولتي ځواکونه او دفاع الوطني؛
• یمن: انصارالله؛
• لبنان: حزب الله؛
• فلسطین: د فلسطین اسلامي جهاد او حماس غورځنګونه.[۱۸]

د مقاومت چورلیز ډلې

شمېر	نوم	جوړېدل	جوړوونکی	تکړه شخصیتونه	مشر	مذهب	زېږنځای	علامت	رسنیز
۱	امل غورځنګ	۱۳۵۳ل	امام موسی صدر	مصطفی چمران	نبیه بری	شیعه	لبنان		NBN ټیلي ویژن
۲	د فلسطین اسلامي جهاد غورځنګ	۱۳۶۰ل	فتحی شقاقی	رمضان عبدالله حسام ابوهَربید	زیاد نَخاله	اهل سنت	غزه		د فلسطین الیوم چینل
۳	د لبنان حزب الله	۱۳۶۱ل		سید عباس موسوی سید حسن نصرالله	نعیم قاسم	شیعه	لبنان		المنار چینل
۴	بدر تنظیم	۱۳۶۴ل		عدنان ابراهیم ابومهدي المهندس	هادي العامري	شیعه	عراق		الغدیر چینل
۵	حَماس (حركة المقاومة الاسلامية)	۱۳۶۶ش	شیخ احمد یاسین	عبدالعزیز رنتیسی اسماعیل هنیه یحیی سنوار	د حماس موقته کمیټه	اهل سنت	فلسطین
۶	سپاه قدس	۱۳۶۹ل	سید علي خامنه اي	احمد وحیدي قاسم سلیماني	اسماعیل قاآني	شیعه	ایران
۷	د یمن انصارالله	۱۳۶۹ل	حسین الحوثي	بدرالدین الحوثي	عبدالملک الحوثي	زیدیه	یمن		المسیره چینل
۸	د عراق کتائب حزب الله	۱۳۸۲ل	ابومهدي المهندس	ابوحسین حمیداوي ابوباقر الساعدی ارکان العلاوي	احمد محسن فرح الحمیداوي	شیعه	عراق		الاتجاه چینل
۹	د عراق کتائب سیدالشهداء	۱۳۸۲ل		ابومصطفی خزعلي حاج ابوسیف	ابوآلاء الولائي	شیعه	عراق
۱۰	عصائب اهل الحق	۱۳۸۳ل	قیس الخزعلي	عبدالهادي الدراجي محمد البهادلي	قیس الخزعلي	شیعه	عراق		العهد چینل
۱۱	د نجباء اسلامي مقاومت	۱۳۸۳ل	اکرم الکعبي	ابوعیسی اقلیم مشتاق کاظم الحواري	اکرم الکعبي	شیعه	عراق
۱۲	زینبیون لښکر	۱۳۹۲ل	د پاکستاني شیعیانو یوه ډله	زینت‌علي جعفري عقید مالک مطهر حسین		شیعه	پاکستان
۱۳	فاطمیون لښکر	۱۳۹۲ل	د افغانستاني جنګیالیو یوه ډله	علیرضا توسلی سید محمدحسن حسینی سید احمد سادات		شیعه	افغانستان
۱۴	حشد شعبي	۱۳۹۳ل		هادي عامري ابومهدي المهندس	فالح فیاض	شیعه	عراق

استراتژۍ او ځانګړنې

د مقاومت غورځنګ غړي په څو استراتژیو او ځانګړنو د نظر اتفاق لري چې د هغوي د یووالي سبب شوې دي. ګډ سیمه ایز هویت او د سیاسي اسلام له نظریې اغېز منل د دغه چورلیز د غړو له ځانګړنو ګڼل شوې دي. همداراز ویل شوي چې د دغه چورلیز غړي د پوځي توان په پیاوړتیا سره د خپلو موخو د لاسته راوړلو هڅه کوي.

سیمه ایز شناخت

ګډ ټولنیز، دیني او کلتوري ارزښتونه او اصول هغه لاملونه دي چې د سیاسي څېړاندو په وینا د مقاومت چورلیز د غړو تر مینځ د ګډ شناخت د جوړېدو سبب شوې او له جغرافیایي واټن او د ګډو پولو له نه لرلو سره سره یې هغوي په یو سیمه ایز هویت او شناخت راغونډ کړې دي.[۱۹] سیمه ګروهنه یا د سیمې بچول یو ډول نوی شناخت ګڼل شوی چې د ملي ګروهنې او نړۍ ګروهنې تر مینځ جوړ شوی او د سیمه ایزو لوبغاړو د ګډو ټولنیزو او کلتوري ارزښتونو او اصولو د رالوړولو هڅه کوي.[۲۰]

د سیمه ګروهنې او سیمه پالنې د نظریې په اساس، د مقاومت چورلیز غړي په دیني تعلیماتو لکه نفي سبیل قاعدې، او ظلم ځپنې، په شان تعلیماتو او په ځينو شعارونو لکه د اسلامي نړۍ وحدت او استکبار توږنې په استناد سره خپلو اهدافو ته په رسېدلو پسې دي.[۲۱]همداراز ویل شوي چې د دغه سیمه ایز هویت او شناخت جوړېدل د ځینو مولفو لکه شهادت غوښتنې [۲۲] له مظلومانو ملاتړ، عدالت غوښتنې، خپلواکي غوښتنې، د ازادي غواړي غورځنګونو ملاتړ، مهدویت، د انتظار تعلیم، او دیني ولسواکۍ په شان مولفو تر اغېز لاندې دي چې د ایران د اسلامي انقلاب په بهېر کې جوړ شول.[۲۳]

ځینو څېړاندو د دغه سیمه ایز هویت جوړېدل په لویدیځه اسیا کې له یو بل هویت او ټلوالې سره په مقابله کې ګڼي چې د ځینو عربي هیوادونو له خوا جوړ شوی او له اسراییلو سره د ساز باز او د ایران د نفوذ د کولو په لټه کې دی.[۲۴]

د سیاسي اسلام له نظریې اغېز منل

د سیاسی اسلام نظریه [یادداشت۱] د لویدیځې اسیا سیمې د څو وروستیو لسیزو په بدلونونو تر ټولو زیاته اغېزشیندونکي نظریه ګڼل شوې چې د سلفي او تکفیري غورځنګونو په چوکاټ کې د هغې فرقه ایز استعمال، په دې سیمه کې د کړکیچ او تاوتریخوالي او مذهبي اختلافاتو یو پړاو جوړ کړی دی.[۲۵] د سلفي غورځنګونو په مقابل کې د شیعه مقاومت په نامه د یوې نوې نظریې خبره کیږي چې د اسلامي انقلاب په کامیابېدو او او په ایران کې د شیعه حکومت په جوړېدو سره جوړ شو او ورسره د ځینو ډلو لکه حزب الله، په عراق کې د شیعه ډلو، د یمن انصار الله او همداراز سني ډلو لکه د فلسطین د حماس او اسلامي جهاد په غږملتیا سره، سیمه ایزو بدلونونو یوه نوې بڼه خپله کړه.[۲۶]

د طاقت د انډول جوړولو لپاره د پوځي طاقت زیاتول

د مقاومت محور په وړاندې د موجودو ګواښونو، او په سیمه کې د سیالو طاقتونو په وړاندې د هغې د کمزورۍ د کمولو په هدف د مقاومت د غړو هیوادونو د پوځي قدرت زیاتول او ورپورې د تړلو ډلو پوځي سنبالښت، د دغه چورلیز له اصلي استراتژیو ګڼل کیږي.[۲۷] د نړیوال امنیت د څېړاندو په وینا، د مقاومت غورځنګ د غړو د پوځي طاقت زیاتول او له ځینو قدرتمنو هیوادونو سره د هغوي غږملتیا سبب شوې چې د سیالو طاقتونو لپاره د مقاومت غورځنګ د غړو په خلاف د پوځي اقدام کولو لګښتونه زیات شي او د هغوي د اقدام مخه ونیسي یا د اقدام په بڼه کې زیات تاوانونه وزغمي.[۲۸]

اقدامات او لاسته راوړنې

د مقاومت چورلیز د جوړېدو له وخته، ځینې اقدامات او لاسته راوړنې لرلي چې هغه یې په یو مهم سیمه ایز او تر یوه حده نړیوال لوبغاړي بدل کړی دی.[۲۹] په دې اقداماتو کې کولی شو د اسراییلو د نیواکګرو اقداماتو په وړاندې د لبنان د حزب الله او فلسطیني ډلو مبارزو، په عراق او سوریه کې د داعش د پراختیا او نفوذ په وړاندې د مقاومت ډلو او د ایران عراق او سوریې هیوادونو مبارزې او په نهایت کې د یمن د انصار الله لخوا په یمن د عربي هیوادونو له یرغل سره مقابلې ته اشاره کولی شو.

په لویدیځه اسیا سیمه کې د شیعیانو د پوزیشن پیاوړتیا

له شیعه تعلیماتو څخه د مقاومت د نظریې ډېر اغېزمنل، د لویدیځې اسیا په سیمه کې د شیعیانو د مقام د پیاوړتیا له لاملونو ګڼل شوی دی.[۳۰] د څیړاندو په وینا، د عراق [۳۱] او یمن [۳۲] په شان هیوادونو او د لبنان په ځینو برخو کې د شیعیانو د قدرت د نفوذ په پیاوړتیا کې د ایران د اسلامي جمهوریت نرم طاقت (غیر پوځي او تبلیغاتي طاقت) موثر و.[۳۳] همداراز د سیاسي څېړاندو په باور، په یوې متقابلې رابطې کې د شیعیانو د سیاسي ټولنیز موقعیت زیاتېدا د مقاومت چورلیز د پیاوړتیا سبب هم ګرځېدلی دی.[۳۴]

د اسراییلو له نیواکګرۍ سره مقابله

د سیاسي څېړاندو په باور، د اسراییلو نیواکګر هویت او په ۱۹۴۸ کال کې په ټاکل شویو پولو د هغوي نه پابندي سبب شوه چې فلسطینیان د اسراییلو په خلاف مبارزې ته وګروهیږي او ځینې تنظیمونه لکه د فلسطین اسلامي جهاد غورځنګ او حماس غورځنګ جوړ شو.[۳۵] دا دوه غورځنګونه چې د فلسطین د نیواکي سیمو د ازادولو په هدف سره جوړ شول،[۳۶] له صهیونسټ رژیم سره یې ډېرې نښتې لرلې دي[۳۷] چې تر ټولو مهم یې د فلسطین لومړۍ او دوهمه انتفاضه [۳۸] د غزې ۲۲ ورځنی جنګ [۳۹] او د الاقصی توپان عملیات یادولی شو.[۴۰]

د صهیونسټ رژیم له اقداماتو سره مبارزه یوازې په فلسطیني ډلو پورې رالنډ نه وو او د لبنان حزب الله هم وکړی شول په ۲۰۰۰ م کال کې د لبنان د جنوب په ځینو سیمو د اسراییلو ۱۸ کلنه پوځي ولکه پای ته ورسوي.[۴۱] په ۳۳ ورځني جنګ کې د لبنان د حزب الله او اسراییلو تر مینځ ټکر هم دوام پیدا وکړ او د ۱۳۸۵ل کال د چنګاښ له وروستیو څخه د همدغه کال د زمري تر وروستیو روان و.[۴۲] حزب الله د الاقصی توپان له عملیاتو وروسته هم د غزې د خلکو د ملاتړ لپاره له اسراییلو سره جنګ پېل کړ چې د دواړو لورو ترمینځ په یو بل سختې ډزې وشوې.[۴۳] په دې نښتو کې د حزب الله عمومي منشي سید حسن نصر الله او د حزب الله ځينې نور کوماندانان شهیدان شول.[۴۴]

په ۱۲۴۶ ل کال (د ۱۹۶۷م کال د جون ۵) کې د اسراییلو او عربو هیوادونو د شپږ ورځني جنګ په زمانه کې، د صهیونسټ رژیم لخوا د جولان لوړو په نامه د سوریې هیواد د ځینو برخو نیواک د اسراییلو او سوریې تر مینځ د د غلیمانه اړیکو د جوړېدو سبب شوې دي.[۴۵] ویل شوي چې د ایران د اسلامي انقلاب له کامیابۍ وروسته او په تېره بیا په سوریه کې د حافظ اسد د زوي بشار اسد د ولسمشرۍ په پېل سره د سوریې او اسراییلو اړیکي لا خراب شول چې له امله یې د ایران او سوریې تر مینځ نزدې اتحاد جوړ شو.[۴۶] د څېړاندو په باور، د سوریې او ایران د یووالي د پیاوړتیا تر ټولو لوی لامل، له اسراییلو سره په مقابله کې د دواړو هیوادونو ګډ نظرونه او همداراز د لبنان له حزب الله یې ملاتړ دی.[۴۷]

په عراق او سوریه کې له تکفیري ډلو سره مقابله

د داعش سلفي ډلې او نورو تکفیري ډلو له خوا د سوریې او عراق د ډېرو برخو نیواک سبب شو چې د مقاومت چورلیز یو ځل بیا د اړونده هیوادونو له پوځي، سیاسي، اقتصادي او ټولنیزو ګواښونو سره د مقابلې لپاره په یو اتحاد بدل شي.[۴۸] له همدې امله د ایران اسلامي جمهوریت په عراق او سوریې کې په خپل پوځي او مشورتي شتون سره د داعش د پرمختګ د مخنیوي لپاره خپله هڅه پېل کړه.[۴۹] په عراق او سوریه کې د سپېڅلو ځایونو په تېره بیا د حضرت زینب(س) د حرم حفاظت، د ایران له نورو موخو ګڼل شوې دي.[۵۰]

په یمن د عربي هیوادونو د تیري په وړاندې د یمن د انصارالله دفاع

انصارالله غورځنګ (تأسیس په کال ۱۹۹۰م کې)[۵۱]د یمن له سیاسي اعتقادي غورځنګونو څخه دی[۵۲] چې ویل شوي د ایران له انقلاب او امام خمیني څخه متاثر دی.[۵۳] دې غورځنګ په ۲۰۱۱م او د اسلامي بیدارۍ غورځنګونو په بهیر کې د یمن دولت په خلاف پاڅون وکړ او وې کړی شول د یمن ځینې سیمې ونیسي. دغه اقدام د یمن د هغه وخت ولسمشر منصور هادي د استعفا او عدن ته د هغه د تګ او د موقت دولت د جوړېدو سبب شو.[۵۴] د منصور هادي له دغه اقدامه وروسته، ځینو عربي هیوادونو د انصار الله په خلاف لویه پوځي حمله پېل کړه چې له انصار الله څخه قدرت بیرته واخلي؛[۵۵] خو په اخر کې د انصارالله په څو کلن مقاومت سره دغه حمله ناکامه شوه.[۵۶]

په لویدیځه اسیا سیمه کې د امریکا مخالفه روحیې پیاوړتیا

د امریکا مخالفه روحیې زیاتېدل او د امریکا د نفوذ کمېدل په لویدځه اسیا کې د مقاومت جبهې له بریاو ګڼل کیږي.[۵۷] د څېړاندو په وینا د امریکا متحده ایالتونه په ۱۹۹۱ م کال کې د شوروي جماهیرو د اتحاد له ړنګېدو وروسته،په لویدیځه اسیا کې د لوړ طاقت په توګه په شتون پسې و چې د اسراییلو امنیت د ساتلو په ترڅ کې، خپلې ګټې هم تامین کړي.[۵۸] له همدې امله ځینې اقدامات یې وکړل چې نتیجه یې د تکفیري ډلو پېدا کېدل وو او مذهبي اختلافاتو ته یې لمنه وویله او په نهایت کې د سیمې هیوادونو د بې ثباتۍ سبب شوه.[۵۹] د دغه اقداماتو په مقابل کې، مقاومت جبهې د استکبار ضد سیاست په پیاوړې کولو او د ځینو اقداماتو لکه له تکفیري ډلو سره مبارزې او له اسراییلو سره د مقابلې په کولو او پر امریکا د اقتصادي لګښتونو په تپلو سره کړی شوي د امریکا د پلانونو په شنډولو سره په سیمه کې امریکایي ضد احساسات هم پیاوړي کړي.[۶۰]

رسندویي فعالیتونه

د مقاومت چورلیز ځواکونو د خپلو رسندویي فعالیتونو د انعکاس لپاره ځینې چینلونه او خبري اژانسونه جوړ کړې دي. په دغو چینلونو کې المنار چینل(د لبنان په حزب الله پورې اړوند)[۶۱]المیادین چینل (په بیروت کې خبري چینل)،[۶۲] المسیره چینل ( د یمن په انصارالله پورې اړوند) [۶۳] الفرات چینل (د عراق د مجلس اعلای اسلامی چینل)[۶۴] الغدیر چینل (د عراق د بدر سازمان ټیلي ویژني او سپوږمکیز چنیل)[۶۵] الاتجاه چینل (د عراق د کتائب حزب الله رسندویي مرکز) او العهد چینل (د عراق د عصائب اهل الحق ډلې رسندویي مرکز)[۶۷] ته اشاره کولی شو.

د ایران د اسلامي جمهوریت ریډیو ټیلي ویژن هم د مقاومت چورلیز په نورو رسنیدو سربېره، هم خبري او هم د مقاومت جبهې پر فعالیتونو د مرکو او خبرو اترو د پروګرامونو په برخه کې په تېره بیا د توفان الاقصی له عملیاتو وروسته پراخ انعکاس لرلی دی.[۶۸] په دغه پروګرامونو کې کولی شو «به افق فلسطین» پروګرام ته اشاره وکړ.[۶۹] العالم، پریس ټي وي او خبر چینل، چې د ایران د اسلامي جمهوریت د ریډیو ټیلي ویژن برخې دي، د مقاومت چورلیز د فعالیتونو په انعکاس کې یې ښه پوره رول لرلی دی.[۷۰]

اړونده څېړنې

• د حرم مدافعان
• د فلسطین نیوکې
• قاسم سلیماني
• اسماعیل هنیه
• عبدالملک الحوثي