سید حسن نصرالله

سید حسن نصرالله

سید حسن نصرالله (۱۳۳۹ل- ۱۴۰۳ل) شیعه عالم او سیاستوال، د مقاومت په سالار مشهور د لبنان د حزب الله دریم عمومي منشي او له بنسټ ګرو یې و. حزب الله د هغه په پړاو کې (له ۱۹۹۲م کال -۲۰۲۴م) په سیمه ایز طاقت بدل شو. په ۲۰۰۰ میلادي کال کې د لبنان د جنوب ازادي، او په ۲۰۰۶ کال کې په ۳۳ ورځني جنګ کې کامیابي د هغه د منشي توب په وخت کې رامینځته شوه. هغه د اسراییلو په وړاندې د مقاومت او څو ځله د بریالیتوبونو په وجه د عربي نړۍ ډېر محبوب او قدرتمن مشر ګڼل کیږي.

نصرالله د نجف د علمیه حوزې او د بعلبک په امام المنتظر مدرسې کې حوزوي درسونه زده کړل. هغه د سید عباس موسوي له شاګردانو او یوه موده یې د سید محمود هاشمي، سید کاظم حائري او محمد فاضل لنکراني په درسونو کې په قم کې برخه اخستې وه.

سید حسن له ۱۹۷۵ تر ۱۹۸۲م کاله په لبنان کې د یو شیعه سیاسي تشکیلاتو امل غورځنګ غړی و؛ خو په ۱۹۸۲ل کال کې له یو شمېر مبارزو عالمانو سره له دغه غورځنګه جدا او حزب الله یې جوړ کړ. هغه د د ۱۹۹۲م کال د فرورۍ په ۱۶ د سید عباس موسوي له شهادته وروسته د حزب الله د عمومي منشي په توګه غوره شو او په ۱۰۲۴م/۱۴۰۳ ل کال کې د شهادت تر وخته پورې په دغه مقام کې و. نصر الله د عمومي منشي توب په وخت د مقاومت د چورلیز له مشرانو سره ډېرې کتنې او اړیکي درلودل.

سید حسن نصر الله د ۱۴۰۳ل کال د تلې په ۶/ د ۲۰۲۴ل کال د ستمبر په ۲۷ د جمعې په ورځ، د صهیونسټ رژیم له خوا د لبنان په جنوب کې د ضاحیه سیمې په بمبارۍ کې شهید شو. د هغه شهادت ډېر غبرګونونه لرل. د ایران مشر سید علي خامنه اي، د تقلید مراجعو لکه سید علي سیستاني، ناصر مکارم شیرازي، حسین نوري همداني، سبحانی، شبیري زنجاني، جوادي آملي، بشیرحسین نجفي او همداراز د مختلفو هیوادونو دولتونو او چارواکو او د مقاومت ډلو لکه حماس غورځنګ، د فلسطین اسلامي جهاد، د یمن انصارالله غورځنګ، فتح غورځنګ، عصائب اهل الحق ډلې، د لبنان امل غورځنګ، د عراق د ملي واکمنۍ، په عراق کې د صدر جریان هم د بیانیو په خپرولو سره د سید حسن په شهادت تسلیت ووایه او د اسراییلو حملې یې وغندلې. په ایران کې پینځه ورځې، په لبنان، سوریې، عراق او یمن کې درې درې ورځې عمومي ویر اعلان شو. د مختلفو هیوادونو خلکو هم د دغه ترور په غندنه کې مظاهرې وکړې.

په نصرالله باندې له شهادته مخکې ځو ځله په ۲۰۰۴، ۲۰۰۶ او ۲۰۱۱ م کلونو کې د اسراییلي ځواکونو له خوا حملې شوې خو بچ پاتې شوی و.

د هغه مشر زوی، سید محمد هادي هم په ۱۹۹۷ م کال کې له اسراییلي ځواکونو سره په نښته کې شهید شو.

د اسراییلو له نیواکګرۍ سره مبارزه

سید حسن نصرالله د لبنان له مشهورو څېرو و هغه د اسراییلو له دوه ویشت کلن نیواکه وروسته په ۲۰۰۰ کال کې د لبنان د جنوب په ازادولو کې د خپل رول او همداراز په ۲۰۰۶ کال کې په ۳۳ ورځني جنګ کې د بریالیتوب په وجه «د مقاومت په سید» ملقب شو. نصرالله د اسراییلو په وړاندې څو ځله د کامیابۍ او مقاومت په وجه، په اسلامي نړۍ کې د محبوب شخصیت، تر ټولو محبوب او د عربي نړۍ تر ټولو د قدرتمند او زړه ور مشر په توګه معرفي شوی دی. د هغه حماسي خبرې او پیاوړی شخصیت د هغه د محبوبیت عوامل ګڼل شوې دي. له اسوشیټډ پریسه د یورو نیوز د نقل له مخې نصرالله په عربي او اسلامي نړۍ کې د میلیونونو کسانو او لبنانیانو د احترام وړ و. یورو نیوز همداراز نصر الله د ایران تر ټولو د نزدې متحد او د اسراییل د ډېر سخت دښمن په توګه یاد کړی دی.

د سید حسن نصر الله وینا لبیک یا حسین یعنی....

د لبنان د حزب الله عمومي منشي توپ

سید حسن نصرالله د ۱۹۹۲ م کال د فرورۍ په ۱۶ د سید عباس موسوي له شهادته وروسته د لبنان د حزب الله د ټولو غړیو په اجماع د دغه ګوند عمومي منشي شو. هغه د حزب الله د عمومي منشي توب د منلو په وخته ۳۲ کلن و.

ویل شوي چې حزب الله د سید حسن د رهبرۍ په زمانه کې په سیمه ایز طاقت بدل شو او پر صهیونسټ رژیم یې ځینې بریالیتوبونه ترلاسه کړل چې تر ټولو مهم یې په ۲۰۰۰ میلادي کال کې د لبنان د جنوب ازادول او په ۲۰۰۶ کال کې د ۳۳ ورځني جنګ او په ۲۰۱۷م کال کې ترهه ګرو ډلو ته ماته ورکول شامل دي. هغه حزب الله د امریکا د سترګو ازغی او د اسراییلو د نیواکګرو طرحو په مقابل کې اساسي خنډ باله. د لبناني اسیرانو په ازادۍ او په ۲۰۰۴ کال کې د اسراییلو له لاسه د مقاومت د مبارزانو د جنازو بیرته اخستل هم اساسي او کلیدي ګنل شوې دي. حزب الله د سید حسن د عمومي منشيتوب په زمانه کې، سیاسي فعالیتونو ته داخل شو او د هغه ځینو غړیو د لبنان پارلیمان ته لاره وموندله.

سید حسن د اسراییلو د ترور یوه هدف وه او ویل شوي چې له ۲۰۰۶ م کاله راهیسې د اسراییلي ځواکونو له خوا د ترور د ګواښ په وجه په پټه اوسیده. د هغه ویناوې په مجازی کې او ویډیو کانفرنس په وسیله خپرېدې. هغه په ۲۰۰۴ ، ۲۰۰۶ او ۲۰۱۱ کالونو کې د اسراییلو له حملو سره مخ شو خو بچ پاتې شو.

د ۱۴۳۴ق کال عاشورا په ورځ د سید حسن نصر الله وینا:

« په خپلو روحونو، ځانونو، بچیانو او مالونو سره مو حسین(ع) ته لبیک وایو.«لبیک یا حسین» مونږ به دې تړون او بلنې ته شا نه کړو... ټولو طاغتیانو، تیري ګرو، مفسدانو، فرصت غواړو او هغه کسان چې زمونږ د ارادې، هوډ او مقاومت ماتولو ته یې زړه ښه کړی، وایو چې مونږ د هغه امام ، د هغه ښځو او هغو سړو بچیان او هغو ځوانانو وروڼه یوو چې د عاشورا په ورځ له حسین سره ودرېدل او د حسین دا جمله یې تاریخ ته په خطاب کې وویله چې«... هَیْهات مِنّا الذِّلّة».»

د مقاومت له نورو ډلو سره اړیکي

سید حسن نصر الله د لبنان د حزب الله د عمومي منشي توب په مقام کې، د مقاومت له چورلیز سره نزدې اړیکي لرل. هغه د ایران او د حماس په شان فلسطیني مبارزو ډلو سره متحد و. نصرالله د الاقصی طوفان له عملیاتو وروسته په غزې د اسراییلو د حملو په بهیر کې د فلسطین د مقاومت د ملاتړ او ننګې لپاره د لبنان په جنوب کې یوه جبهه جوړه کړه او اعلان یې وکړ چې دغه جبهه به د غزې د جنګ تر پایه پورې دوام ولري. د لبنان حزب الله د هغه د عمومي منشیتوب په پړاو کې د لبنان له امل غورځنګ سره هم ښه اړیکي لرل. همداراز نصرالله او حزب الله له سوریې، یمن، او عراق سره هم اړیکي لرل او ورسره یې مرسته وکړه.

له ایران سره اړیکي

له ښي لاس: سید حسن نصرالله، حسن اختري، سید علي خامنه اي، سید ابراهیم امین السید، سید عباس موسوي (۱۳۷۰ل)

سید حسن له ایران او د هغه له مشرانو سره ښه او دوستانه اړیکي لرل او په ځلونو یې ایران ته سفر کړی او د ایران له مشرانو سره یې کتلې وو. هغه په لومړي ځل په ۱۳۶۰ ل یا ۱۳۶۱ل کال کې په جماران حسینیه کې له امام خمیني سره کتنه وکړه. په ۱۳۶۵ ل کال کې هم د حزب الله له غړیو سره د امام خمیني کتنې ته راغی. له امام خمیني سره د هغه اخري ملاقات د امام خمیني له وفاته څو میاشتې مخکې او د امل غورځنګ او حزب الله تر مینځ نښتې د وخت دی.

لکه څنګه یې چې سید حسن نصرالله په خپل ژوند لیک کې ویلی، له ایت الله خامنه اي سره د هغه نزدې اړیکي له ۱۳۶۵ل کال پېل شوې. هغه په ځلونو د ایران له پوځي او ملکي چارواکو لکه د قدس ځواک د هغه وخت له کوماندان قاسم سلیماني د ایران د وخت له خارجه وزیر حسین امیر عبداللهیان سره کتنه لرله.

نصرالله ایران خپل دوست او د حزب الله ملاتړی ګاڼه او له ایرانه یې دفاع کوله. منجمله د ۱۴۰۳ل کال په وري د /۲۰۲۴م کال په اپریل کې په دمشق کې د ایران په کونسلیټ د اسراییلو د حملې په غبرګون کې یې د اسراییلو د سزا کولو لپاره د ایران د حق ملاتړی و. هغه له ایران سره دوستانه اړیکي د ځان لپاره ویاړ ګاڼه.

حسن نصر الله د ۲۰۰۹ م په نومبر کې د حزب الله نوی سیاسي سند اعلان او وړاندې کړ چې په ایران کې په ولایت فقیه د حزب الله پابندي او ژمنه د دغه ډلې یوه کړنلاره ګڼل شوې وه. د الجزیرة او یورونیوز، چینلونو په وینا، د حزب الله ځینې مخالفان او کارپوهان، نصر الله او ګوند یې په لبنان کې د ایران ګوډاګی او استازی ګڼي.

سید حسن نصرالله:

«مونږ باوري یو چې د دې زمانې یزید چې باید ورسره حسیني او زینبي مقابله وکړو، د امریکا صهیونیستی پروژه ده داسې پروژه چې زمونږ امت، تمدن، اسماني دینونه ،ولسونه او سپېڅلتیاوې ګواښ. او مونږ د دغه یزید په وړاندې حسیني او او زینبي وو او وو به.»

• 

  سید حسن نصرالله د اسماعیل هنیه (د سید حسن نصر الله په څنګ کې ښي لاس ته کس) په څنګ کې او د حماس له ځینو مقاماتو سره.

• 

  سید حسن نصرالله او آیت الله خامنه اي او قاسم سلیماني.

• 

  سید حسن نصرالله د قاسم سلیماني او ابومهدی المهندس په څنګ کې.

ژوندلیک او تعلیم

سید حسن نصرالله د۱۹۶۰ کال د اګست په ۳۱ / د ۱۳۳۹ ل کال د وږي په اتمه نېټه د بیروت د ختیځ په یوې محلې کې پیدا شو. پلار یې «سید عبدالکریم» او مور یې «نهدیه صفي الدین» د لبنان په جنوب کې د صور ښار د خواوشا البازوریه کلي استوګن وو چې بیروت ته یې مهاجرت کړی وی. په ځينو سرچینو کې ویل شوي چې هغه په بازوریه کې زېږېدلی دی. سید حسن درې وروڼه او پینځه خویندې لري. او په هلکوانۍ کې یې له خپلو وروڼو سره یو ځای د پلار د مېوې په پلورنځي کې کار کاوه.

د سید حسن نصرالله د ژوند اینفو ګرافي

نصرالله لومړۍ زده کړې په التربویه سیمه کې په خصوصي ښوونځي النجاح کې وکړې او د ۱۹۷۵ په اپریل کې د لبنان د کورني جنګ په پېلېدو سره له خپلې کورنۍ سره د پلار زیږنځی بازوریه کلي ته منتقل شو او د لیسې تعلیم یې په صور ښار کې جاري وساته.

سید حسن په خپله وینا، له وړوکوالي له علمیه حوزې او روحانیت سره مینه لرله خو پلار او مور یې مخالف وو. هغه په ۱۹۷۶م/۱۳۵۵ ل کال کې د صور ښار د جمعې امام او سید محمد باقر د شاګرد سید محمد غروي په هڅونه د دیني علومو د زده کړې لپاره نجف ته لاړ. سید محمد په یو لیک کې سید حسن شهید صدر ته معرفي کړ. شهید صدر هم سید عباس موسوي، د سید حسن نصرالله په تعليمي حالت د څارنې او د هغه د اړتیاو په پوره کولو وټاکه. سید حسن په ۱۹۷۸ م کال کې د حوزې مقدماتي زده کړې پای ته ورسولې او په نجف کې له دوه کاله استوګنې وروسته، د عراق د بعث رژیم د فشارونو په وجه لبنان ته ستون شو. هغه په ۱۹۷۹م /۱۳۵۷ کال کې په بعلبک کې د منتظر مدرسې په جوړولو سره، خپل حوزوي تعلیم ته دوام ورکړاو له دې سره په یو وخت په تدریس هم بوخت شو.

هغه په ۱۹۸۹ م /۱۳۶۷ل یا ۱۹۹۰م/ ۱۳۶۹ ل کال کې یو د دیني علومو د زده کړې لپاره قم ته سفر وکړ او د سید محمود هاشمي، سید کاظم حائري او محمد فاضل لنکراني په درس کې یې برخه واخیسته. لبنان ته د نصرالله د ستنېدو سبب، له امله غورځنګ سره د حزب الله د اختلافاتو د زیاتېدو په اړه اوازې ګڼل شوې دي.

نصر الله د خپل تعلیم په څنګ کې، مختلفې پوځي زده کړې او چریکي ټریننګونه هم وکړل.

• د لبنان د مقاومت د سړي (سید حسن نصرالله) ژوند لیک

• 

  سید حسن نصر الله په نجف کې د خپل استاد سید عباسي موسوي په څنګ کې
  

• 

  سید حسن نصرالله په ۱۹۸۰م کال کې په لبنان کې.

مېرمن او بچیان

نصرالله په ۱۹۷۸ کال کې په ۱۸ کلنۍ کې له فاطمه یاسین سره واده وکړ چې ترې د محمد هادي، محمد جواد او محمد علي په نومونو درې زامن او د زینب په نوم یوه لور پیدا شول. د هغه مشر زوی سید محمد هادي د ۱۹۹۷م کال د ستمبر په ۱۲/د ۱۳۷۶ ل کال د وږي په ۲۲ د لبنان په جنوب کې له اسراییلي ځواکونو سره په نښته کې شهید شو. د هغه جنازه د صهیونسټانو لاس ته ولویده او یو کال پس د اسراییلو او حزب الله تر مینځ په مبادله کې لبنان ته ستنه شوه.

شهادت

اصلي مقاله: د سید حسن نصرالله ترور

د ایران د اسلامي انقلاب د مشر ایت الله خامنه اي د تسلیت پېغام:

«لوی مجاهد، په سیمه کې د مقاومت بېرغوال، فضیلت لرونکی دینی عالم او سیاسي مدبر مشر جناب سید حسن نصرالله رضوان الله علیه، د لبنان په بیګانیو پېښو کې د شهادت مقام ته ورسېد او ملکوت ته والوته. د مقاومت عزتمن سید په یوې سپېڅلې مبارزې کې د لسګونو کاله فی سبیل الله جهاد او د هغه د سختیو بدله وموندله... له دومره مجاهدتونو وروسته د شهادت فیض د هغه مسلم حق و. اسلامي نړۍ، یو عظمت لرونکی شخصیت او د مقاومت جبهې یو تکړه بېرغوال ، او د لبنان حزب الله یو کم ساری مشر له لاسه ورکړ، خو دهغه د څو لسیزو د جهاد او تدبیر برکتونه به هیڅکله له لاسه لاړ نه شي... د مقاومت سید ، یوازې یو سړی نه و، یوه لاره او یو مکتب و، او دا لاره به هماغه راز دوام ومومي. د شهید سید عباس موسوي وینه په ځمکه پاتې نه شو، د شهید سید حسن وینه به هم په ځمکه پاتې نه شي.»

سید حسن نصرالله، د جمعې په ورځ د ۱۴۰۳ل کال د تلې په ۶/ د ۲۰۲۴م کال د ستمبر په ۲۷ د صهیونسټ رژیم له خوا د لبنان په بیروت د جنوب کې په شیعه میشته سیمه ضاحیه په بمبارۍ کې شهید شو. له اسراییلي رسنیوڅخه د الجزیره چینل په نقل، اسراییلو په دغه بمباریو کې کابو ۸۵ سنګر شکنه یا دوه ټني بمونه وکارول؛ په داسې حال کې چې د جنیوا کنونشن له دغه شان بمونو استفاده منع کړې ده. د خبري اژانسونو د راپور په اساس د نصرالله تنه روغه وه او د هغه د مرګ سبب شاک او یا د چاودنې له امله ضربه او ټکان او یا د بمباریو له امله د زهرجنو ګازونو استنشاق او راکښل اعلان شوی دی.

غبرګونونه

د سید حسن نصر الله شهادت ډېر غبرګونونه لرل. د هغه د شهادت خبر د امام رضا(ع) په حرم او امام علي(ع) په حرم په عامه توګه اعلان شو. د ایران د اسلامي انقلاب مشر سید علي خامنه اي، او د تقلید مراجعو لکه سید علي سیستاني، ناصر مکارم شیرازي، حسین نوري همداني جعفر سبحاني، سید موسي شبیري زنجاني، عبدالله جوادي آملي، بشیر حسین نجفي، حسین وحید خراساني او همداراز د قم د علمیه حوزې د مدرسینو ټولنې او د اهل بیتو نړیوالې ټولنې د تسلیت پېغامونه ورکړل.

د مختلفو هیوادونو دولتونو او چارواکو لکه ایران، روسیه، عراق، یمن، کیوبا، ونزوئلا او د مقاومت ډلو لکه حماس غورځنګ، د فلسطین اسلامي جهاد، د یمن انصارالله غورځنګ، فتح غورځنګ، عصائب اهل الحق ډلې، د لبنان امل غورځنګ، د عراق د ملي واکمنۍ د جریان مشر سید عمار حکیم، په عراق کې د صدر جریان مشر مقتدی صدر، د پاکستان جماعت اسلامي او د پاکستان جمعیت علمای اسلام ګوندونو په خپرو کړو بیانیو کې د سید حسن په شهادت تسلیت ووایه. او د اسراییلو حملې یې وغندلې.

په ایران کې پینځه ورځې په لبنان، سوریې، عراق او یمن کې درې ورځې عمومي ویر اعلان شو. د ایران علمیه حوزې یکشنبه رخصتي شوې او طلابو او عالمانو د صهیونسټ رژیم د جنایتونو په غندنه کې غونډې او لاریونونه وکړل. په ایران کې ټولې سینماګانې او تهیټرونه رخصت شول.

د مختلفو هیوادونو لکه ایران، پاکستان، یمن، اردن، مغرب، د فلسطین لویدیځې غاړې، بحرین، او عراق خلکو د سید حسن د ترور په غندنه کې او د حزب الله په ملاتړ کې غونډې او مظاهرې وکړې. د ایران د اسلامي انقلاب سپاه پاسداران، د سید حسن نصر الله او د (۱۴۰۳ل کال د زمري په ۱۰) د اسماعیل هنیه د ترور په ځواب کې د همدې کال د تلې په لسمه د وعده صادق ۲ عملیاتو په کولو سره، د اسراییلو په پوځي او امنیتي سیمو په لسګونو توغندي وویشتل.

• 

  په نصر جمعه کې د سید حسن نصر الله د درنښت دستورې، د تهران مصلی (عیدګاه) د ۱۴۰۳ ل کال د تلې ۱۳.

• 

  د سید حسن نصر الله د ترور په غندنه او د لبنان او غزې په ملاتړ کې د یمن د خلکو مظاهرې.

• 

  د سید حسن نصر الله د شهادت په درنښت کې د پاکستان د لاهور ښار د خلکو لاریون.

• 

  د سید حسن نصر الله د شهادت په غندنه کې د مشهد ښار د خلکو غونډه.

سیاسي فعالیتونه: له امل غورځنګ تر حزب الله پورې

سید حسن نصرالله د خپل عمر له لومړیو کلونو سیاسي فعالیت پېل کړ. د هغه ځینې سیاسي فعالیتونه عبارت دي له:

• هغه په ۱۹۷۵ کال کې د لیسې د پړاو له ختمولو وروسته له امام موسی صدر سره د مینې په وجه، د امل غورځنګ سره یو ځای شو او د خپل ورور سید حسین سره په خپل زیږنځي البازوریه ښارګي کې د دې غورځنګ مشر شو.
• په ۱۹۸۲ م کال کې د امل غورځنګ د سیاسي کمیټې غړی شو او په بقاع سیمه کې یې د دغه غورځنګ سیاسي مسوولیت په غاړه واخیست.
• په ۱۹۸۲ م کال کې د صهیونسټ رژیم ځواکونو له خوا د لبنان له نیواک او د اسراییلو او لبنان تر مینځ د سولې له طرحې وروسته د امل غورځنګ ځینې مشران، سید حسن له ځینو مبارزو عالمانو لکه سید عباس موسوي، او صبحي طفیلي سره له امل غورځنګ جدا شول او د لبنان د حزب الله لومړی نیالګی یې کېښود.
• په ۱۹۸۵ م کال کې په بقاع سیمه کې د حزب الله د مسوول او استازي په توګه وټاکل شو.

سید حسن نصرالله

• په ۱۹۸۷ کال کې د حزب الله د اجرایي کمیټې مشر او د حزب الله د فیصله کولو د شورا غړی شو.
• هغه په ۱۹۸۹ او ۱۹۹۰ کالدکې او په قم کې د خپل شتون په وخت په تهران کې د حزب الله استازی او په ایران کې د حزب الله د کارونو د تعقیبولو مسوول و.
• هغه په ۱۹۹۲ م کال کې د سید عباس موسوي په ترور پسې د حزب الله د عمومي منشي په توګه انتخاب شو.
• سید حسن په ۱۳۶۰ ل کال کې په حسبیه او شرعیه چارو کې د تصرف او د شرعیه وجوهاتو د اخستلو اجازه له امام خمیني واخیسته. هغه همداراز په بیروت او جبل عامل کې د ایت الله خامنه اي استازی او وکیل و.

له نصر الله سره اړوند اثار

د سید حسن نصر الله د شخصیت په اړه د کتابونو، فلمونو، مستند فلمونو او سندرو په ګډون ډیری اثار تولید شوي. ځینې یې دا دي:

لیکلي اثار

• سید عزیز کتاب (د حجت الله الاسلام سید حسن نصر الله د خپلې خولې ویلی ژوند لیک) په هڅه د حمید داوود آبادي. د اکتاب د ایت الله خامنه اي په تقریظ خپور شوی هغوی لیکلی:« هر څه چې د دغه عزتمن سید د لا ډېرې پېژندنې او قدرونې سبب شي، ښه او زما لپاره مطلوب دي.
• سید حسن نصر الله: انقلابی جنوبی، لیک د رفعت سید احمد او ژباړه د اسماء خواجه زاده، چاپ او خپرېدل په قم کې ۱۳۹۴ل کال.
• زبور مقاومت؛ د لبنان د حزب الله د عمومي منشي سید حسن نصر الله ژوند، دریځونو او نظرونو ته یوه کتنه، په قلم د محمد حسین بزي او ژباړه د مصطفی اللهیاري، په ۱۳۸۷ ل کال کې په لومړي ځل د سازمان تبلیغات اسلامي خپرنځي لخوا خپور شو.

سید عزیز کتاب

• آزادترین مرد جهان کتاب؛ تألیف د راشد جعفرپور.
• نصرالله کتاب؛ له سید حسن نصر الله سره د محمد رضا زائري خبرې اترې.
• رهبری انقلابی سید حسن نصرالله کتاب؛ تألیف د آزیتا بیدقی قره‌باغ.

ډاکومنټري او سرودونه

• نگاهی به زندگی سید حسن نصرالله ډاکومنټري چې له خبر چینله خپره شوې.
• منادیان آزادی ډاکومنټري (د سید حسن نصرالله برخه) خپره شوې له خبر چینله.
• نصرالله در چشم دشمنان ډاکومنټري؛ المیادین چینل دغه پنځوس منټي مستند د سید حسن نصر الله د ویناوو په اساس او د اسراییلو کارپوهانو او شناندو د شننو او فلمونو په اساس جوړه کړې ده.
• حکایة حسن ډاکومنټري: دغه ډاکومنټري له العربیه چینله خپره شوه د العربیه چینل مشر د دغه ډاکومنټرۍ د خپرولو په وجه له خپل مقامه څنګ ته کړی شو.

د سید حسن لپاره د مختلفو سندرغاړو له لورې ډېرې ترانې سرودونه او تصویري سرودونه جوړ او خپاره شوې دي چې ځینې یې دا دي: «نصرالله» سرود په غږ د علی نفری، په عربۍ ژبه «یا نصرالله» تصویري سرود د علي العطار په غږ د فارسۍ تصویري سرود «ما باز می‌گردیم» په غږ د علیرضا علیزاده، فارسي تصویري سرود «وقت مجازات» په غږ د حسین رضایی، فارسی او عربی تصویري سرود «عاشقان قدیمی» په غږ د امید معنوی، «امانتدار بانوی دمشق» تصویري سرود، په دوو ژبو (فارسی و عربی) په غږ د مجتبی مینوتن او حامد محضرنیا، «یا سیدی» سرود او «للسید رب یحمیه» سرود په غږ د بسام شمص، عربي سرود «أحبائی» په غږ د جولیا بطرس مسیحی لبنانی سندرغاړی(۲۰۰۶م)، «یا نصرالله» سرود په غږ د علاء زلزالي لبنانی سندر غاړی (۲۰۰۷م).

اړونده څېړنې

• اسماعیل هنیه
• قاسم سلیماني