د اسلامي انقلاب د سپاه پاسداران د قدس ځواک

دا مقاله د تدوین په حال کې ده!

د اسلامي انقلاب د سپاه پاسداران لوګو

د اسلاي انقلاب د سپاه پاسداران د قدس ځواک یا سپاه قدس، چې د اسلامي انقلاب ګارډ پورې تړلی دی، د دې ادارې د بهرنیو چارو مسئولیت په غاړه لري. قدس ځواک په ۱۳۶۹ کال کې د ایران د اسلامي جمهوریت د رهبر سید علي خامنه اي په امر جوړ شو.

احمد وحیدي د قدس ځواک لومړی قوماندان و چې اوه کاله یې دغه دنده په غاړه درلوده. په ۱۳۷۶ کال کې قاسم سلیماني، د ایران د رهبر له خوا د قدس ځواکونو د قومندان په توګه وټاکل شو او په ۱۳۹۸ کال کې، د امریکا د هغه وخت د ولسمشر ډونالډ ټرمپ په امر د بغداد په هوايي ډګر کې په برید کې شهید شو او اسماعیل قاآني د دې ځواک د قوماندان په توګه وټاکل شو.

له هېواده په بهر کې مشورتي او پوځي شتون، د سیمې په هېوادونو کې د شیعه ځایونو او نښانونو ساتنه لکه د امامانو(ع) د حرمونو او د مقاومت د ډلو تنظیمول لکه په لبنان کې حزب الله او په عراق کې د حشد الشعبي، د قدس ځواک له مهمو فعالیتونه څخه وو. د دغه ځواک د مشورتي او پوځي فعالیتونو یوه برخه، په عراق او سوریه کې د داعش او تکفیري ډلو پر وړاندې د مبارزې لپاره حاضریدل وو.

قدس ځواک د فلسطین له مقاومت څخه هم ملاتړ کوي او د فلسطین د مقاومت ډلې یې په پرمختللو وسلو سمبال کړی څو د اسرائیلو پر وړاندې ودریدی شي.

تاریخ او تأسیس څرنګوالی

د سپاه پاسداران انقلاب اسلامي قدس ځواک چې د قدس ځواک په نوم یادیږي، د سپاه پاسداران انقلاب اسلامي له پنځو ځواکونو څخه[یادونه 1] یو ځواک دی.[1] قدس ځواک په ۱۳۶۹ کال کې د ایران د اسلامي جمهوریت د دوهم رهبر، سید علي خامنه اي په حکم سره، د سپاه ځواکونو سره ورزیات شو.[2]

ویل شوي چې د سپاه قدس د ځواک د فعالیت تاریخ د رمضان کمپ او بدر لوا ته ورګرځي.[3] رمضان کمپ د سپاه پاسدارانو لومړنۍ ځواک و چې په 1362 کې د مرتضی رضایی تر قوماندې لاندې د سرحدونو څخه بهر د عملیاتو د ترسره کولو لپاره تاسیس شو.[۴] په هرصورت، ځینو د سپاه پاسداران قدس ځواک د جوړښت اصل د آزادۍ د غورځنګونو یو واحد ګڼلی دی.[5]

ایت الله خامنه ای د ۱۳۹۸ کال د مرغومي د میاشتې په ۲۷ د جمعې د لمانځه په خطبو کې د سپاه پاسداران قدس ځواک د بې سرحده جنګیالیو په توګه معرفي کړ چې هر چرته اړتیا وي هلته به حاضریږي او په خپل ټول توان سره د نورو ملتونو او په سیمه کې د کمزورو خلکو مرسته به کوي او د ایران له هېواد څخه به د جګړې، ترور او بربادۍ سیوري لیرې کوي.[۶]

قوماندانان

همدارنګ وګورئ: قاسم سلیماني

احمد وحیدي، د سپاه پاسداران د قدس ځواک لومړۍ قومندان و، چې له ۱۳۶۹ څخه تر ۱۳۷۶ پورې یې ۷ کاله د دې ځواک قومانداني په غاړه درلوده.[۷] په ۱۳۷۶ کال کې د ایران د اسلامي جمهوریت د رهبر سید علي خامنه اي له خوا، قاسم سلیماني د قدس ځواک د دوهم قوماندان په توګه، د دغه ځواک د قوماندې لپاره وټاکل شو.[۸] د ډونلډ ټرمپ په مستقیم امر، د 1398 کال د مرغومې په ۱۳ مه، قاسم سلیماني سره د ابو مهدي المهندس د بغداد هوايي ډګر ته څېرمه د امریکايي بې پیلوټه الوتکې په برید کې شهیدان شول.[۹] له دغې پېښې وروسته د ایران د اسلامي جمهوریت رهبر، اسماعیل قاآني د قدس ځواکونو د نوي قوماندان په توګه وټاکه.[۱۰]

فعالیتونه

د سپاه قدس ځینې فعالیتونه په دا ډول دي:

په سیمه چې د مقاومت د مرکزونو تنظیمول

په سیمه کې د بحرانونو د مدیریت په برخه کې د سپاه پاسداران قدس ځواک یو له مهمو فعالیتونو څخه په لبنان کې د حزب الله، په عراق کې د حشد الشعبي، په افغانستان کې د لشکر فاطمیون او په یمن کې د انصارالله د ځواکونو په څیر د مقاومتي ډلو جوړول، تنظیم او تقویه کول دي.[11] د دغو ډلو ګډ هدف د امریکې او اسرائیلو او د هغوی د پلانونو پر ضد جګړه ده.[۱۲] ایت الله خامنه اي په ټوله نړۍ کې د حزب الله د عامو خلکو د مرکزونو جوړول د امام خمیني له ارمانونو څخه ګڼلي، چې اوس د سپاه پاسداران د قدس ځواک د ماموریت په توګه تعریف او عملي شوي دي.[13]

په بیلا بیلو هېوادونو کې مشورتي او پوځي حضور

د سپاه پاسداران د قدس ځواک یو له مهمو فعالیتونو څخه په سیمه ایزو بحرانونو کې مشورتي او نظامي حضور دی.[14] د سیمې په هیوادونو کې د قدس ځواک ځینې شتونونه او فعالیتونه په لاندې ډول دي:

• په بوسنیا کې فعالیت

د سپاه قدس لومړۍ رسمي حضور د اروپا د مسلمانانو په ملاتړ کې، د بوسنیا له جګړې سره تړاو لري.[۱۵] په بوسنیا او هرزیګوینا کې د کورنۍ جګړې په جریان کې، چې د صربانو، بوسنیانو او کرواتو ترمنځ وې،[16] د قدس ځواک د بوسنیایي مسلمانانو سره د مرستې لپاره ګمارل شوی ځکه چې هغو مسلمانانو نظامي ځواک نه درلود.[17]

• په افغانستان کې فعالیت

د ۱۹۸۰م کار په لومړۍ لسیزې کې د پخواني شوروي اتحاد له یرغل وروسته په افغانستان کې د قدس ځواک حضور له پولو بهر د قدس ځواک له نورو فعالیتونو څخه ګڼل کیږي.[۱۸] په افغانستان کې د سپاه قدس ځواک له لومړنیو کارونو څخه یوه د احزاب هشتګانه په نوم د شیعه مجاهدو ډلو جوړول وو، چې وروسته د افغانستان د اسلامي وحدت ګوند سره یې اتحاد وکړ او همدارنګ د افغانستان له اسلامي جمعیت سره یې هم همکاري کوله چې د برهان الدین رباني او احمد شاه مسعود په مشرۍ کې وو.[۱۹]

• 33 ورځنې جنګ

په ۲۰۰۶م کال کې د اسرایلو او لبنان د حزب الله تر منځ ۳۳ ورځنۍ جګړه وه[۲۰] او ویل کیږي چې د هغه مهال د قدس ځواک قومندان قاسم سلیماني ۳۳ ورځې د عملیاتو په خونه کې او د حزب الله د قومندانانو ترڅنګ موجود و.[21] هغه په ​​یوه مرکه کښې وویل له حزب الله سره په ۳۳ ورځنی جنګ کښې د معنوي، مادي، وسلو، تجهیزاتو او رسنیزو مرستې د ایران د اسلامی جمهوریت د رهبرۍ او نورو چارواکو غوښته ګڼلې ده.[۲۲]

• په عراق او سوریه کې داعش سره مقابله

قاسم سلیماني؛ د سپاه پاسداران د قدس ځواک قوماندان له ۱۳۷۶لمریز کال تر ۱۳۹۸لمریز.

په عراق او سوریه کې د داعش او تکفیری ډلو پر وړاندې مبارزه د سپاه پاسداران قدس ځواک یو له مهمو فعالیتونو څخه ګڼل شوي دي.[23] دا فعالیتونه د مشورتي مرستو، د عملیاتو نقشه جوړولو او قوماندې کولو او پوځي عملیاتو په بڼه وو.[۲۴]

• په یمن کې حاضریدل

په یمن کې د قدس ځواک د شتون په اړه بېلابېل خبرونه دي. د سعودي ایتلاف رسنۍ په ۲۰۱۴م کال کې د یمن له انقلاب وروسته په یمن کې د قدس ځواکونو د ځینو اجنټانو او قوماندانانو د شتون ادعا کوي.[۲۵] د دغو رسنیو په وینا، د سپاه پاسداران قدس ځواک ځینې کارمندان په یمن کې وو چې د انصارالله ځواکونو ته یې له ایران څخه د توغندیو، بې پیلوټه الوتکو او پوځي وسلو د ملاتړ، جوړولو او انتقال مسولیت په غاړه درلود.[۲۶] له بلې خوا، د سپاه پاسداران د قدس ځواک اقتصادي مرستیال رستم قاسمي په ۲۰۱۹ کال کې په یوه مرکه کې وویل چې د ایران د سپاه پاسداران قدس ځواک په یمن کې شتون نه لري.[۲۷]

د فلسطین د مقاومت د ډلو ملاتړ او مزبوتیا

قدس ځواک د فلسطیني مقاومت مرسته او ملاتړ کوي. د حماس د یوه مشر په وینا، قاسم سلیماني په قدس ځواک کې د خپلې قوماندې پرمهال، حماس د اسراییلو په وړاندې په پرمختللو وسلو سمبال کړی دی.[۲۸] د ایران رهبر ایت الله خامنه اي هم ویلي دي: قاسم سلیماني د امریکایانو په وړاندې چې غوښتل یې فلسطینیان په یوه کمزوري حالت کې وساتي تر څو د جګړې تونه ونه لري، د هغوي لاس ډک کړ؛ هغه داسې کار وکړ چې مقاومت دا توان پیدا کړ چې د غزې د تړانګې په شان یوه وړه سیمه د صهیونیسټ رژیم په وړاندې، له خپلو ټولو ادعاګانو سره، ودریږي.[۲۹] د ۱۴۰۲ کال د غبرګولي په میاشت کې د فلسطین د اسلامي جهاد غورځنګ عمومی منشی زیاد النَخاله، آیت الله خامنه اي ته په یوه لیک کې د اسلامي جمهوري د ملاتړ او د فلسطين او اسرائيلو تر منځ په دولس ورځنۍ جګړه کې د قدس ځواک او د هغه د قوماندان اسماعیل قاآنی، د رول له امله مننه وکړه.[۳۰] همدارنګه د طوفان الاقصی له عملیاتو وروسته د قدس ځواک قوماندان اسماعیل قاآني هم د دغه ځواک له خوا د هغوي ملاتړ اعلان کړ.[۳۱]

د امامانو(ع) د حرم ساتنه او دفاع

ویل شوي چې د سپاه پاسداران قدس ځواک له کړنو څخه یو خاص کار په عراق او سوریه کې د داعش او تکفیري ډلو د ګواښونو او بریدونو په وړاندې د شیعه امامانو د زیارتونو ساتنه وه.[۳۲] په همدې لړ کې په سامرا باندې د داعش د حملې تمبول یو له دغو اقداماتو څخه ګڼل کیږي چې د ۱۳۹۳ کال د غبرګولي په ۱۵ نیټه داعش د امام هادي(ع) او امام حسن عسکري(ع) د زیارتونو د نیولو او ویجاړولو په هدف د سامرا په ښار باندې پراخ برید شورو وکړ او د دغه ښار ځینې سیمې یې ونیولې،[۳۳] د قدس ځواک د قاسم سلیماني تر قوماندې لاندې او د مقاومت د ډلو او عراقي پوځ په هماهنګۍ او همکارۍ سره وتوانید چې دغه بریدونه په شا وتمبوي.[۳۴]

د مقاومت چورلیز ډلې

شمېر	نوم	جوړېدل	جوړوونکی	تکړه شخصیتونه	مشر	مذهب	زېږنځای	علامت	رسنیز
۱	امل غورځنګ	۱۳۵۳ل	امام موسی صدر	مصطفی چمران	نبیه بری	شیعه	لبنان		NBN ټیلي ویژن
۲	د فلسطین اسلامي جهاد غورځنګ	۱۳۶۰ل	فتحی شقاقی	رمضان عبدالله حسام ابوهَربید	زیاد نَخاله	اهل سنت	غزه		د فلسطین الیوم چینل
۳	د لبنان حزب الله	۱۳۶۱ل		سید عباس موسوی سید حسن نصرالله	نعیم قاسم	شیعه	لبنان		المنار چینل
۴	بدر تنظیم	۱۳۶۴ل		عدنان ابراهیم ابومهدي المهندس	هادي العامري	شیعه	عراق		الغدیر چینل
۵	حَماس (حركة المقاومة الاسلامية)	۱۳۶۶ش	شیخ احمد یاسین	عبدالعزیز رنتیسی اسماعیل هنیه یحیی سنوار	د حماس موقته کمیټه	اهل سنت	فلسطین
۶	سپاه قدس	۱۳۶۹ل	سید علي خامنه اي	احمد وحیدي قاسم سلیماني	اسماعیل قاآني	شیعه	ایران
۷	د یمن انصارالله	۱۳۶۹ل	حسین الحوثي	بدرالدین الحوثي	عبدالملک الحوثي	زیدیه	یمن		المسیره چینل
۸	د عراق کتائب حزب الله	۱۳۸۲ل	ابومهدي المهندس	ابوحسین حمیداوي ابوباقر الساعدی ارکان العلاوي	احمد محسن فرح الحمیداوي	شیعه	عراق		الاتجاه چینل
۹	د عراق کتائب سیدالشهداء	۱۳۸۲ل		ابومصطفی خزعلي حاج ابوسیف	ابوآلاء الولائي	شیعه	عراق
۱۰	عصائب اهل الحق	۱۳۸۳ل	قیس الخزعلي	عبدالهادي الدراجي محمد البهادلي	قیس الخزعلي	شیعه	عراق		العهد چینل
۱۱	د نجباء اسلامي مقاومت	۱۳۸۳ل	اکرم الکعبي	ابوعیسی اقلیم مشتاق کاظم الحواري	اکرم الکعبي	شیعه	عراق
۱۲	زینبیون لښکر	۱۳۹۲ل	د پاکستاني شیعیانو یوه ډله	زینت‌علي جعفري عقید مالک مطهر حسین		شیعه	پاکستان
۱۳	فاطمیون لښکر	۱۳۹۲ل	د افغانستاني جنګیالیو یوه ډله	علیرضا توسلی سید محمدحسن حسینی سید احمد سادات		شیعه	افغانستان
۱۴	حشد شعبي	۱۳۹۳ل		هادي عامري ابومهدي المهندس	فالح فیاض	شیعه	عراق